Регион-влак кокласе социальный институт (МОСИ) да Боевой искусство дене студент-влакын регионысо рӱдерышт самырык-влакым спорт шӱлышеш шуарыме пашам шукертсек виктарен шогат. Тений 11-19 декабрьыште ты институтышто «Боевые искусства – основа здорового будущего» форум эртаралтын. Грант дене палемдалтше ты паша Марий Элыште да Юл кундем Федеральный округышто боевой искусствым вияҥдаш, тиде сферыште тыршыше туныктышо, тренер-влаклан, икте-весышт деч тунемын, мастарлыкым нӧлташ полша.
Форум годым каратэ, кендо, айкидо дене мастер-класс-влак, Юл кундем округысо спорт организаций-влакын еҥышт да Марий Элысе молодежный политике, спорт да туризм министерстве пашаеҥ-влак дене шанче-практик конференций, вашлиймаш-влак эртаралтыныт.
МОСИ Айкидо дене Российысе калыкле совет, Российысе студент-влаклан спорт ушем, Боевой искусство-влак шотышто Российысе ушем дене ятыр жап кылым куча. Ты ганат форумышто ты организацийла гыч еҥ-влак лийыныт. МОСИ-н самырык тукым дене тазалыкым пеҥгыдемдыме шотышто пашам ыштымыжым 26 ноябрьыште Москошто эртаралтше Студенческий спорт лиге-влакын фестивальыштыштат кӱкшын акленыт. Фестивальыште элнан тӱрлӧ кундемже гыч 19 студенческий спорт лиге мастарлыкышым ончыктен. Тунам МОСИ «Лучшее высшее учебное заведение» диплом ден епалемдалтын.
