5-11 июнь – Йоча-влакын тазалыкыштым аралыме арня.
Кызыт икшыве-влак ятыр жапым телефон дене, компьютер ончылно эртарат, шагал тарванылыт. А тиде тазалыкым чотак лунчырта. Йоча-влак кокла гыч 90 процентше гаджет дене шуко жапым эртарымылан кӧра мален огеш тем. Тыгак утыждене ноя, шинча начарынрак ужаш тӱҥалеш, туп пӱгырга. 14 ияш деч кугурак подростко кечыште компьютер ончылно кок шагат деч утла шинчышаш огыл.
Мом кочмо нергенат шоналтыман. Тудо пайдале лийшаш, сакыран да шинчалан кочкыш деч кораҥман.
Гаджет дене шинчыме олмеш йӧратыме сомыллан жапым шукырак ойыраш тыршыман. Кечыште кеч ик шагатым физкультурлан ойырыман.
Ийготым шотыш налын, йочам тӱрлӧ спортыш пуаш лиеш:
4 ияш-влаклан бадминтон, ӱстембал теннис, футбол, хоккей келшен толыт, нуно координацийлан пайдале улыт, психикым пеҥгыдемдат.
5 ияш йочам акробатикыш, спортивный да художественный гимнастикыш, иймашке, фигурный мунчалтымашке, шахматыш да шашкыш колташ лиеш. Нуно координацийым, чытышым, тӱткылыкым вияҥдат.
6-7 ияш йочалан академический гребле, байдарке да каноэ дене коштмаш, иймаш, велоспорт, куржталмаш, ече пеш лачеш толыт. Нуно писылыкым, чытышым вияҥдат.
8 ияшлан куштылго атлетике, кӱкшытыш да кужытыш тӧрштылмаш, баскетбол, спринтерский дистанций-влак, кучедалмаш (дзюдо, эрыкан, греко-римский кучедалмаш, самбо) чытышым, вийым, чулымлыкым, писылыкым вияҥдат.
9 ияшлан биатлон, пуля дене, йоҥеж гыч лӱйкалымаш сай. Координацийым вияҥдат, психически пеҥгыдемдат.
10 ияшлан бокс, кикбоксинг, каратэ, тхэквондо, фехтований келшен толеш. Нуно виянракым, писыракым, чулымракым, чытышанракым ыштат.
11 ияш йоча альпинизм, спортивный туризм, скейтбординг, сноубординг, паркур, неле атлетике дене заниматлен кертеш. Нуно чытышанракым ыштат, координацийым вияҥдат.
Тыгак йочам тӱрлӧ чер деч аралаш прививке нерген мондыман огыл.
Азан 0-7 кечашыж годым В гепатит, туберкулёз деч прививкым ыштат,
1 тылзашлан – В гепатит деч,
2 тылзашлан – пневмококк, ротавирусный инфекций деч,
3 тылзашлан – столбняк, дифтерий, коклюш, полиомиелит деч,
4-5 тылзашлан – столбняк, дифтерий, коклюш, полиомиелит, пневмококк деч,
6 тылзашлан – В гепатит, полиомиелит деч,
12-18 тылзашлан – А гепатит, корь, краснухо, оспа, паротит, полиомиелит, пневмококк, дифтерий деч,
1,5-2,5 ияшлан – полиомиелит, пневмококк деч,
6-7 ияшлан – столбняк, дифтерий, коклюш, корь, краснухо, паротит, туберкулёз, полиомиелит деч,
11-14 ияшлан – дифтерий, столбняк, полиомиелит, туберкулёз, айдемын папиллома вирусшо деч.