Кӱлыт: 1 стакан кылмыктыме облепихе, 1 грушо, 2 кугу совла сакырложаш, 1 кугу совла коштымо чайшудо, тыртыш семын пӱчмӧ 1 апельсин, 600 мл шолтымо вӱд.
Грушым сайын мушса, шӱмжым эрыктыза да пӱчкедыза. Тудым да облепихым блендер дене тыгыдемдыза. Ямде вартышым шокте гоч шӱрыза да сотейникыш пыштыза. тушко сакырым, апельсиным да чайшудым ешарыза. Шокшо вӱдым опталза, да шолаш пурымешке, изи тулышто кучыза. Изиш шолтыза. Сайын лугыза да петыртыш дене петырен шындыза. Шым-лу минут наре шинчыктыза да чайникыш шӱрыза. Ты чай дене йӱштӧ годым ыраш шотлан толеш. Тыгак иммунитет пеҥгыдемеш!