Туныктымо аланыште тыршыше кажне пашаеҥ верч профсоюз кӱлынак тырша. Тидыже поснак туныктымо аланысе профсоюз ушемын тӱвыргӧ паша лектышыж гоч раш палдырна. Теве у тунемме идалык тӱҥале веле, В.С.Фёдоров (Морко районышто туныктымо аланысе профсоюз толкын вуйлатыше) мемнам илыш дене тӧр ончыко вӱда. Ик тылзе жапыште моткоч шуко паша ышталте. 28 сентябрьыште Морко районысо чыла школла гыч профсоюз ушем вуйлатыше-влак туныктымо пӧлкаш семинарыш чумыргышна.
Тудын кышкарыштыже Морко районысо туныктымо пӧлка вуйлатыше В.В.Кирчанов у вашталтыш дене палдарыш. Районышто туныктымо паша шотышто мо ышталтмаш нерген шонымаш кажне профсоюз ушем вуйлатышылан кӱлешан. Умбакыже мутым Валерий Семёнович нале да кодшо тунемме идалыкым иктешлыш, у паша радам дене палдарыш. Тыге профсоюз ушем вуйлатыше-влакын район кӱкшытан семинарышт тӱвыргӧ саскам пуыш.
Таклан огыт ойло: «Чылажат вуйлатыше дечын шога». А Морко кундемысе туныктымо аланыште профсоюз толкыным лач Валерий Семёновичак кугу вий-куат дене виктарен толеш. Тудо ты сомылым ынде ятыр ий шуктен шога. А чылажат туныктышын пашаж гыч тӱҥалын. Арамлан огыл семинар жапыште ты ончылъеҥна нерген пеш шуко сай шомак йоҥгалте. Кӧжӧ Валерий Семёновичым йӧратыме туныктышыжо семын курым дене моктен ила, а весе шке жапыштыже тудын ДЮСШ-ым виян вуйлатен шогымыжлан уло чонжо дене акла да примерлан шотла. Валерий Семёнович шукерте огыл шке вачӱмбакыже 65 ийым пыштыш, а ончылъеҥын чапле юбилей пайремже калыкын чонышто кугешнымаш кумылым веле луктеш.
А профсоюз таҥасымаш нерген поснак шуко ойлаш лиеш. Теве тунемме идалык мучко школ пашаеҥ-влаклан пеш шуко таҥасымаш эртаралтеш. Кажне ийын сентябрь тылзын «Тазалык» спартакиаде тӱҥалтышым ышта. Куштылго атлетике куржталмаш ты ийын 4 октябрьыште эртаралте. Чылажге районысо туныктымо тӧнежлаште тыршыше профсоюзын еҥже-влак кокла гыч 60 спортсмен куржталме трассышке шогалын. Нунын коклаште кыдалаш школла гыч 5 еҥ, а тӱҥ школла гыч 3 спортсмен лийын.
Ӱдырамаш-влак ик меҥге кужытышто шке чолгалыкыштым тергеныт гын, а пӧръеҥ-влак кок меҥгыш куржыныт. Кыдалаш школ-влакын командышт коклаште Морко 1-ше номеран школын командыже сеҥышыш лектын. 2 вер дене Морко 2-шо номеран школ палемдалтын. 3 верым Арын школ налын. Тыгак кугу чолгалыкым Кокласола лицей, Зеленогорский, Морко районысо физкультур рӱдер, Морко 6-шо номеран школ, Октябрьский ден Нужключ школ ончыктеныт. А тӱҥ школ-влакын командышт коклаште Кожлаер школ сеҥыше лийын. 2 вер дене Шӱргыял, 3 вер дене Купсола школ палемдалтын. Поснак кугу писылыкым Шордӱр, Кумыжъял школ да 1-ше номеран йочасадын командышт ончыктеныт.
А 7 октябрьыште чумыр элна мучко Пашам аралыме кечым палемденна. Чыла школласе профсоюз ушем шке паша кышкарышкыже тиде лӱмлӧ кечым пуртен. Тугеже ме пеҥгыдын каласен кертына: профсоюз шке пашаеҥжын чапшым керек-кунамат арален шога. Тидланже Морко кундемыштына поснак кугу тӱткыш ойыралтеш. Чыла школласе профсоюз ушем вуйлатыше-влак лӱм дене мый В.С.Фёдоровлан пеш кугу таум каласем. Ты чолга айдеме мемнам ончыко вӱда. Тудым ме Морко кундемнан чын патриотшылан шотлена да эртыше чапле юбилей пайремже дене шокшын-шокшын саламлена!
Елена Григорьева, Морко районысо туныктымо аланысе профсоюз ушемын президиумжын еҥже.
Снимкыште: Морко районышто эртаралтше «Тазалык» спартакиадын чолга спортсменышт.