Кум ийыште «Оптимальная для восстановления здоровья медицинская реабилитация» федеральный проект почеш Марий Элысе медорганизацийлаш федеральный да республикысе бюджет гыч ойырымо 232 млн наре теҥгеаш 273 медицинский изделийым наледыме.
2022 ийыште Марий Элысе медорганизаций-влак кокла гыч 1-ше №-ан Медико-санитарный часть 67 млн теҥгеаш 49 реабилитационный оборудований дене ик эн ончыч пойдаралтын.
2023 ийыште Республикысе йоча клинический эмлымверлан 50,4 млн наре теҥгеаш 127 медицинский изделийым налме.
Тений Йошкар-Оласе клинический эмлымверыш, Сар ветеран-влакын республикысе клинический госпитальышкышт да Волжск оласе рӱдӧ эмлымверыш 96 оборудованийым налаш 114,9 млн наре теҥгелан контрактым ыштыме.
2030 ийлан айдемын илышыжым 78 ияш марте да 2036 ийлан 81 ияш марте шуяш, тыгак калыклан таза илыш условийым ышташ, 2030 ийлан пашам жаплан ыштен кертдымым (тичмашнек ончымаште) иземдаш кугу тӱткыш ойыралтеш.
Россий Президент В.Путинын темлыме «Продолжительная и активная жизнь» национальный проектын 11 федеральный проектышкыже «Оптимальная для восстановления здоровья медицинская реабилитация» проектат пурталтеш.
Марий Элысе Тазалык аралтыш министерствын медицинский реабилитаций шотышто тӱҥ внештатный специалистше Андрей Сафронов палемда:
– Республикысе 5 организацийыш кызытсе медицинский оборудованийым наледыме дене кӱкшӧ квалификациян медицинский реабилитацийым вес регионыш кайыдеат эртарен кертына. Черлыеҥ-влакын тазалыкыштым пеҥгыдемдаш полшышо аппарат ятыр. Мутлан, Йошкар-Оласе клинический эмлымверлан – эмганыше рӱдӧ нерве системан черлыеҥ-влаклан «А3» локоматым (роботизироватлыме механотерапий полшымо дене йолын локомоторный функцийжым уэмда), вуйдорыкышто вӱр начарын коштмылан кӧра организмыште баланс тренировкым ышташ аппарат.
Парезан да параличан черлыеҥ-шамычлан реабилитацийым эртарымаште циклический тренировко-влак сайын полшат. Тыгайжым «Орторент Мото» ден «Ormed moto» тренажёр-влак дене эртарат, кидысе, пулвуйысо, йол йыжыҥ-влакым эмлаш полшышо артромот-влак улыт.
Эмганыше рӱдӧ нерве системан черлыеҥ-шамычын кидышт «ок колышт», тыгай еҥ-шамычлан реабилитацийым эртарыме годым «Артромот F» да «Аника» перчаткым налме.
Тошкалтыш дене кӱзаш-волаш тунемаш полшышо параподиум уло.
Чыла тиде оборудований-влак организмлан функцийжым уэш шукташ тӱҥалаш, черлыеҥын илыш качествыжым саемдаш, пашам ыштен кертмыжым арален кодаш полшат.
Марий Элысе Тазалык аралтыш министерствын министерствын архивше гыч налме фото.