Самырык еҥ, студент-влак специальный военный операцийыште улшо-влаклан, тӱрлӧ йӧным кучылтын, полышым пуат.
Кодшо кугарнян Йошкар-Оласе торгово-технологический колледжын студентше ден туныктышыжо-влак кочкышым, шокшо вургемым, эмым погеныт. Йошкар-Оласе сервисный технологий техникумышто тунемше студент-влак Шочмо элым аралышын кечыж вашеш серышым возымо Российысе акцийыш ушненыт. Тыге нуно салтак-влакын кумылыштым нӧлтеныт.
Советский районысо Молодёжный парламентын еҥже-влакат (снимкыште) ты пашашке чолган ушненыт. Ты районым вуйлатыше да Депутат-влак Погынын Председательже Сергей Халтурин Молодёжный парламентын енже-влак дене пырля боец-влаклан 50 блиндажный сортам ямдылен. Тыгай сорта кужу жап йӱла, кугу мардеж годымат огеш йӧрӧ. Сандене тудо специальный военный операцийыште улшо-влаклан кӱлеш лиеш: волгалтараш, ыраш, тыгак кочкаш шолташ полша.
Марий Эл Республикын Молодёжный парламентшын еҥже, тыгак Советский районысо ты парламентын председательже Илья Куклин районысо администрацийын пашаеҥже-влак дене пырля боец-влаклан посылкым ямдылен.