2-8 июнь – Йочан тазалыкшым аралыме арня
Йочан тазалыкшым арален кодаш манын, икшывылан мом ышташ? Тидын нерген Марий Элын Тазалыкым аралыме министерствын ава лийме да йоча пагытым аралыме пӧлкажын консультантше Елена Тимофеева умылтара.
- Режим кажне кечын. Ик жапыште мален кынелаш да возаш, кочкаш да тӱнӧ кошташ тыршыман. Режимым шукташ гын, йоча сайрак тунемеш, сайынрак шкенжым куча.
- Омо. Ик ияш марте аза 12-18 шагат малышаш, 1-3 ияш йоча –11-14 шагат, 3-7 ияш йоча –10-13 шагат, изирак класслаш коштшо ӱдыр-рвезе – 10-11 шагат, а кугурак класслаште тунемше-влак – 9-10 шагат.
Малаш вочмо деч ончыч пӧлемым южаҥдыман. Пӧлемыште южын температуржо 18-20 градус леве лийшаш. Пеҥгыде матрас сайрак, а вакшыш шартыш пушкыдо да натуральный куэман лийшаш.
- Кочкыш. Кочкыш химический ешартыш деч посна лийшаш. Жаритлыме, коптитлыме, мариноватлыме, консервироватлыме кочкыш, фастфуд деч кораҥман. Свежа фрукт ден пакчасаскам, коядыме шылым, колым, шӧр продуктым чӱчкыдын кочман.
- Физический упражнений. Таза илыш-йӱлам кучыман. Тӱрлӧ упражнений организмым пеҥгыдемда, чер-влакым сеҥаш полша. Капкыл мотор лиеш, кумыл кӱза.
- Йочан кумылжо шукыж годым еш дене кылдалтын. Йоча черланымын ик эн тӱҥ амалже – уда эмоций, стресс, тургыжланымаш, еш тума. Ача-ава-влак шкеныштым тыматлын кучышаш, икшывыштын койыш-шоктышыштышт вашталтышым эскерен шуктышаш улыт. Йоча дене мутланыман, полшен шогыман да сай примерым ончыктыман.
- Профилактике тергымаш. Ик ияш марте йочам кажне тылзын врач деке коштыктыман, 1-2 ияш йочам – пел ийлан ик гана. Кугурак йочам 0 кажне ийын да врачын темлымыже почеш.
- Вакцинаций. Прививке йочам лӱдыкшӧ инфекций: туберкулёз, В гепатит, пневмококковый инфекций, ырлыган, краснухо – да моло деч арален кертеш.