1-7 апрель – Таза илыш-йӱлам вораҥдарыме арня эрта.
«Тарванылмаш – илыш!» — маныт. Таза лияш манын, капкыллан физический нагрузкым чын пуыман. Тидын нерген Общественный тазалык да медицине профилактике рӱдерын вуйлатыше Надежда Фролова каласкала.
Чогашылын пашам ыштымыж годым организм пиал гормоным луктеш. Тудыжо нерве йымымым кораҥда да вийым ешара. Тыге кумыл нӧлтеш да пашам ыштыме шуэш. Чогашылын пашам шуктымыж годым айдемын чыла гаяк органже да системыже «помыжалтыт». Садлан таза лияш манын, организмым тонусышто кучыман.
Спорт дене кылым кучышо илалше еҥ-влак 5-7 ийлан самырык еҥын гай пашам ыштат. Шуко тарванылше йоча-влак сайынрак вияҥыт, тыгак вуйушышт сайынрак пашам ышта. Сандене изинек шагал тарванылше икшыве-шамыч шукыж годым начар улыт да чӱчкыдын черланат.
Эрдене але пашаште гимнастикым ышташ гын, капкыллан кугу пайда лиеш. Эр зарядке нерве системым помыжалтара да тудын пашажым саемда. Зарядкым яндар южышто ышташ лиеш. Тылеч вара капкылым вӱд дене чывылташ але йӱштӧ вӱдеш нӧртымӧ солык дене ӱшташ келшен толеш. Тидыже тазалыкым эшеат пеҥгыдемда, вӱргорнын пашажым саемда да пуалмашым кораҥда.
Мален кынелме деч вара куштылго упражнений-влакым ыштен, кумыл нӧлтеш, чулым койыш ылыжеш. Тыгак вий, чытымаш, писылык, лывыргылык ешаралтыт.
А пашам ыштыме годым зарядкым ыштыманак. Поснак компьютер ончылно шинчыше-влаклан. Зарядкылан кӧра тупрӱдӧ, шинча нойымо эрта. Тӱҥжӧ – ӧрканыман огыл. А тидланже теве мом шотыш налман: илышыш эркын дене зарядкым пуртыман, ончыч куштылгырак упражнений-влакым ыштыман, варажым кажне кечын тудым шуктыман. Тыге организм зарядкылан тунемеш. Тидыже ончыкыжым айдемым чулымрак лияш, тазалыкшым пеҥгыдемдаш полша.