16-22 февраль – Пӧръеҥ тазалыкым аралыме арня
Пӧръеҥ тазалык – тиде капкыл да психологий тазалык, вий-куат, чытыш. Кызытсе саманыште утыждене тургыжланыме, пайдале огыл кочкыш, начар тарванылме да уда койыш пӧръеҥ-влакын тазалыкыштлан эҥгекым ыштат. Марий Эл Республикысе Тазалык аралтыш министерствын тӱҥ внештатный урологшо, Республикысе клинический эмлымверын урологический отделенийжым вуйлатыше, медицине науко доктор, профессор В.Дубровин профилактике семын икмыняр правилым шотыш налаш темла:
- пайдале кочкышым кочман;
- шукырак тарванылман;
- оккӱл койыш деч утлыман;
- уролог дене жапыштыже тергалтман.
Самырык пӧръеҥ-влакын шукыж годым мочеполовой системе орган-влак пуалме чер-влак (хронический эпидидимит, цистит, простатит), кугурак ийготан-шамыч коклаште доброкачественный гиперплазий да предстательный ту рак вашлиялтыт.
45 ияш деч кугурак ийготан пӧръеҥ-влакын ик эн чӱчкыдын вашлиялтше онкологий чер – предстательный ту рак. Чер диагностике шотеш ПСА-лан (простат-специфический антиген) вӱрым сдатлыман. Черым ончылгоч пален налын да эмлалташ тӱҥалын, сай лектышыш шуаш лиеш.