Тау тылат, почтальон!

Почтальон-влак лудшо-шамычлан газетым жапыште намиен шуктат, подписке пашам виктарен толыт, калыкым марий газетлан шӱмаҥдат. «Кугарня» газетнамат Марий кундемнан шуко суртыш нумалыт. Тау нунылан.

Кужэҥер район Йӱледӱр селасе почтышто Алевтина Владимировна Кузнецова 8 ий тырша. Шке пашажым йӧрата. Почтышко арнялан кум гана кум меҥге тораште верланыше Тошто Йӱледӱр ял гыч коштеш. Телым лум-поран вошт вик корно дене ече ден мунчалтен толеш. Йӧра, кеч кеҥежым изиш куштылгырак: велосипедышке шинчеш да кудалеш. Йыр кужун кайыман, а тыгеже писынрак пашашке миен шуаш лиеш.

Такшым Алевтина Кузнецова Ежовысо совхоз-техникумышто зооветеринарлан тунем лектын. Тысе колхозышто ветеринарлан, варажым вольык ончышылан ыштен. Икана паша корно тудым почтышко конден.

«Ик жап пашам ыштен омыл, мӧҥгыштак шогылтынам. Почтышто ик почтальон пенсийышке лекте, да олмешыже мыйым ӱжӧ. Кайышым. Тачат тыштак ыштем. Ме нылытын тыршена: вуйлатыше да кум почтальон. Чылаже 11 ялышке газет миен шуэш. Мый  Йӱледӱр селашке, Тошто Йӱледӱр, Пургак яллашке шупшыктем. «Кугарня» газетым 19 суртышко намиен пуэм. Мемнан велне «Кугарням» чылаже 59 еҥ налеш. Утларакшым районысо «Заря» газетым лудыт. Тыгак «Марий Эл», «Семейный» газет-влакымат йодыт.

«Кугарня» газетым чылаж годым ик семын огыт нал. Ик гана подпискым шукынрак ыштат, вес гана – шагалрак. Пытартыш жапыште ик семынак кая. Утларакшым кокла ийготан, илалше-влак лудыт. Поснак «Изи тӱня, кугу тӱня» лаштыкым вучат. Вара самырык артист-влак нерген лудаш йӧратат. Мыланем пытартыш лаштыкысе опрос келша.

«Кугарня» газетын пашаеҥже-влакым шушаш лӱмгече пайрем дене уло кумылын саламлем. Ончыкыжат газет тыгак лектын шогыжо, да марий лудшо-влак ешаралт толышт. Тираж кугемже», – ойла Алевтина Владимировна.

Йӱледӱр селасе почтым 14 ий Маргарита Ивановна Никонова вуйлата.