Параньга район Элпанур ялыштат газетнам лудыт, йӧратат. Тидым самырык почто вуйлатыше Татьяна Малининан мутшо пеҥгыдемда. 21 ияш ӱдыр ты пашам 10 тылзе шукта. Йошкар-Оласе Радиомеханический техникумышто бухгалтерлан тунемын, кызыт Волгатехыште экономистлан заочно шинчымашым налеш.
«Кок почтальонкына уло. «Кугарня» газетын кокымшо пелийжылан подпискым ыштен пытарыме. Чылаже 35 утла еҥ налеш. Газетым Элпанур, Павыл почиҥга, Руш Лебляк яллашке шупшыктена. «Марий Эл» газет дене таҥастарымаште «Кугарням» шукынрак йодыт. Еҥ-влак республикыште мо ышталтме нерген, пайдале ой-каҥаш шамычым лудаш йӧратат. Тыгак «Кугарня» газетын эртарыме тӱрлӧ конкурсышкыжо ушнат. Кодшо ийын Элпанур ял гыч ик еҥ 3 литр мӱйым сеҥен нале», – каласыш Татьяна.
Почтальонко Маргарита Викторовна Инородцева Параньга район Элпанур гыч 5 меҥге тораште верланыше Павыл почиҥга ялыште ила. Газетым шупшыктымаште тудлан Маша ӱдыржӧ полышкала. Машин дене кудалыштыт.
Шкеже почтышто 4 ий тырша. Газетнам моктен ойлыш, куштылго огыл пашаж нерген каласкалыш.
«Икымше пелийлан подпискым эре шукын ыштат (39 еҥ налын), кеҥеж жаплан – шагалрак, молан манаш гын тунам лудаш жап уке, эре паша. Павыл почиҥгаште 5 еҥ, Руш Лебляк ялыште 1 еҥ подпискым ыштат. Утларакшым пенсийыш лекше-влак налыт. «Кугарня» газетым эре моктат. Самырык-влак нерген лудаш оҥай, маныт. Газет сай, лудаш куштылго. Мый газетым тӱҥалтыш гыч мучаш марте лудам.
Почтальонын пашаже куштылго огыл – эре йол ӱмбалне лийман, куржталман. Поснак тул, газ квитанцийым, серышым (извещенийым)-влакым, пенсийым пуыман.
«Кугарня» газетын пашаеҥже-влаклан сай статьям возымыштлан таум ойлымо шуэш. Таза, кужу ӱмыран лийза», – пелештыш Маргарита Викторовна.