Татьяна лӱм шочынак пӱралтын

25 январьыште  Российыште Студент-влак да Тачана-шамыч шке кечыштым пайремлат.  Шнуй Татьяна студент-влакын аралтышыштлан шотлалтеш. Марий Турек район Памашъял гыч Татьяна Дегтярёвалан тиде кече – кум пачаш пайрем. Тудо ты кечын эше шочмо кечыжым палемда.

Крючок, бас-гитаре

Таня МарГУ-со Общий да профессиональный образований факультетыште дизайн да декоративно-прикладной искусство направлений дене кумшо курсышто тунемеш. Ӱдыр изинек сӱретлаш, ургаш, шке кид дене тӱрлӧ арверым ышташ йӧратен. Кызытат лишыл еҥже-влаклан тӱрлӧ модышым, шарфым пидеш. Тыгак Татьяна кушташат мастар.

Мый Карлыган кыдалаш школышто шинчымашым погенам. 6-11-ше класслаште «Ӟардон» удмурт калык фольклор ансамбльыш коштынам. Тушто руш, марий да удмурт калык куштымаш дене палыме лийынам. Ме верысе тӱвыра пӧртыштӧ выступатленна, воктен верланыше яллаш лектын коштынна, тыгак Марий Эл, Татарстан, Удмурт республиклаш, фестиваль ден пайремлаште мастарлыкнам ончыктенна, – палдара Т.Дегтярёва.

Икымше курсышто тунеммыж годым студентке «Голос юности» университетысе фестивальыш ушнен. Кугурак курслаште тунемше ӱдыр-рвезе-шамыч Таням «инструментал» направленийыште участвоватлаш кумылаҥденыт.

Мӧҥгыштӧ мый тыглай гитарым южгунам кидышкем налам, а фестивальыште бас-гитаре дене шокташ кӱлын, сандене мыйым ик рвезе студийыште туныкташ тӱҥалын. Тыге тылзе жапыште мый ты семӱзгар дене шокташ тунемынам. Фестивальыште «На седьмом этаже» руш мурым йоҥгалтаренна. Кугу сценыште шогымем годым мыйын кугешнымаш кумыл лектын. Тунам ме чыла факультет коклаште кумшо верым налынна, – шарналта ӱдыр.

Проводник влак коклаште

2024 ийыште Т.Дегтярёва проводник пашаште шкенжым терген ончен.

Мый студент отряд нерген шуко гана колынам, но нунын коклаште лиям манын, ик ганат шоналтен омыл. Йолташ ӱдырем проводник пашам ыштен ончаш кумылаҥын, шкетын каяш лӱдын, сандене мыйым пырля ӱжын. Тыге, шинчымашым налмек, экзаменым кучымек, Санкт-Петербург олаш поезд дене каенна. Тӱҥалтыште кугу ола деке тунем шуаш моткоч неле ыле, но опытан инструктор да моло студент кертмышт семын полышкаленыт, тӱрлӧ ой-каҥашым пуэныт. Тушто мый уло кеҥеж канышым эртаренам да Смоленск, Кисловодск, Сухум (Абхазий) олалаште икмыняр гана лийынам. Проводник пашалан кӧра икымше гана Шем теҥызыште йӱштылынам, шуко у йолташым муынам да шкемым тӱрлӧ ситуацийыште терген онченам, – мане студентке.

Татьяна кум пайремжымат лишыл еҥже дене пайремлаш тырша. Ме тудым саламлена да шке шонымашке шуаш тыланена.