Медведево районысо «Сосновая роща» учебно-тренировочный базыште «ТАТЧУМАРА-2025» регион-влак кокласе кӱкшытан турслёт 13-16 майыште эртаралтын.
Тушто Татарстан, Чуваший да Марий Эл гыч туныктымо аланыште тыршыше да вузласе студент-влак шке чолгалыкыштым тергеныт. Чылажге 21 команде лийын. Ик командыште – 10 еҥ: 8 участник (3 ӱдырамаш да 7 пӧръеҥ), 1 тренер да судья.
Морко районын чапшым «Морко кундем» командына дене араленна. Мыланна вуйын шогеныт: Морко районышто туныктымо аланысе профсоюз ушемын председательже В.С.Фёдоров да районысо Йоча усталык рӱдер пелен тунемше-влаклан ешартыш шинчымашым пуышо туныктышо А.И.Стрелков. Кандашынже командын участникшылан шотлалтме: В.Степанов, С.Соловьёв, А.Борисов, Ю.Романов, А.Никодимов, Л.Сергеева, С.Курочкина да мый, Е.Григорьева.
Кажне кечын тӱрлӧ сынан таҥасымаш вучен. Икымше кечын команде-влак сценыште шкешт дене палдареныт. Ме Морко вел нерген почеламутым йоҥгалтаренна, шкенан гимннам муралтенна. Умбакыже 22 шагатлан кажне команде кум еҥ (кок пӧръеҥ да ик ӱдырамаш) дене спорт ориентированийым эртен. Ик шагат жапыште чодыра лоҥгаште 8 контрольный пунктым (КП) муаш кӱлын. Мландыш йолым тӱкыде куржталме тиде ик шагат жап ӱмырешлан шарнымашеш кодеш. Мылам тиде тат поснак нелын чучын.
Вес кечынже йолын коштмо дистанцийыште спорт туризм дене лично-командный таҥасымаш эртен. Тыште кажне участник ик сер гыч весыш кандыра дене унчыливуя каен, тиде кужытымак кок кандыра дене вончен, оҥа дене куржын да тарзанкыште тӧрштылын. Тыгодым пеш кугу чаракым карабин луктын. Тудым жапыштыже мучыштараш да кӱлеш кандырашке пижыктен да кораҥден шукташ писылык кӱлын.
Вара «Туристын кухньыжо» конкурс эртен. Кажне команде тамле кочкышым тул ӱмбалан шолтен да жюрилан аклаш пуэн. Умбакыже чумыр команде дене кок шагатат пеле жап йӱр йымалне адакат чодыра лоҥгаште куржталме да 15 КП-ым кычалме. Тӱрлӧ станцийыште могай-гынат нелылык гоч вончаш логалын. Поҥгым, кушкылым, янлыкым палашат кӱлын.
Умбакыже краевед-влак ӱчашеныт. Кум регионым авалтыше, историй дене кылдалтше йодыш-влак лийыныт. Тыште Морко посёлкысо 2-шо номеран школ гыч Л.Сергеева пӱсӧ уш-акылже дене ойыртемалтын.
Тыге, йӱд мучко йӱр йымалне палаткыште нӧрен малымеке, кумшо кечышкат вончышна. Тулеш кӱктымӧ кочкышым тамлымеке, 9 шагат эрдене эшеат кугурак паша мемнан чытышнам да вий-куатнам терген. Ындыжым слётын кажне участникше чодыра мучко 40 минут жап шкетын куржталын. Картым да компасым кучен, чодыраште 15 КП-ым верешташ тыршен. Тыгодым ик шонымаш веле лийын, поснак мыйын гай филологын, кудыжо ны картым ок пале, ны компас дене пашам ыштен ок мошто: 40 минут жапыште кеч икмыняр КП-ым верешташ да лагерьышке мӧҥгеш пӧртыл мошташ. Но арам ойгыренна. Чыланат ярныше лийынна, но мӧҥгеш сайын пӧртылынна, тыгодым мыят эн пиаланла чучынам.
Умбакыже кажне командым «Чарак полоса» вучен.
Слёт торасе регионла гыч толшо участник-влакын Йошкар-Ола мучко эртаралтше экскурсийышт дене мучашлалтын. Тыге 300 чоло еҥлан тиде ныл кече кунамже глӱдмашым, чон пырткымашым, тунамак куан шӱлышым пӧлеклен. Мый икымше гана тыгай кугу турслётыш логалынам, тидлан нимынярат ӧкынен омыл.
Елена Григорьева, Морко районысо туныктымо аланысе профсоюз ушем президиумын еҥже.
Снимкыште: «ТАТЧУМАРА-2025» турслётышто шке чолгалыкшым ончыктышо «Морко кундем» команде.