Шукерте огыл марий муро аланыште у шӱдыр чӱкталтын – Эльфис Гараев. Татар рвезын «Кече лектеш, ончалеш» калык мурым мурымыжо да тиде мурыланак войзымо клипше шуко еҥлан келшен.
Тулеч вара самырык мурызо калык ончыко эше кок мурым луктын – «Лий пеленем» да «Айда йолташ».
Таче ме тендам Эльфис Гараев дене лишкырак палымым ыштена.
– Эльфис, марла мурымет, чынжымак, ӧрыктарыш. Интернетысе соцкыл лаштыклаште «Кече лектеш, ончалеш» муро лекмеке, шуко еҥын кушеч улметым пален налмышт шуын…
– Мый Параньга посёлкышто шочынам. Индешымше классым Параньга кыдалаш школышто тунем пытарымеке, умбакыже тысе училищыш механизаторлан тунемаш каенам. Тиде жапыштак музыклан шӱмаҥынам. Поснак мыланем перкалыме семӱзгар-влак келшеныт. Училищым пытарымеке, Палантай лӱмеш тӱвыра да сымыктыш колледжыш калык семӱзгар пӧлкаш тунемаш пуренам. Тудо жапыште перкалыме семӱзгар специальность дене направлений лийын огыл, а мый илышем сем тӱня дене моткоч кылдынем ыле. Сандене балалайке дене шокташ тунемынам. Йошкар-Олаш толмекем, кум тылзе гыч мыйым армийыш наҥгайышт. Пӧртылмек, умбакыжат туштак шинчымашым погенам. Тиде жапыштак тӱрлӧ кавер-группыла дене пырля гастроль дене коштынам да «Марий Эл» кугыжаныш куштышо ансамбльын оркестрыштыже тӱмырым перкаленам.
Колледжым тунем лекмеке, мый Озаҥ оласе тӱвыра институтын джаз пӧлкашкыже «Барабанщик» специальность дене тунемаш кайышым да 2019 ийыште дипломым нальым.
Кызыт Озаҥыште илем, мурызо Элвин Грейын командыштыже шоктем. Тыгодымак у технике-влакым тунемам, эре уым кычалаш тыршем.
– Марла мураш шонымаш кузе шочын?
– Икана палымем, мый декем мийышат, марий мурым мураш темлыш. Тунам тидлан жапем йӧршеш лийын огыл. А кызыт, мӧҥгыштӧ шинчыме годым, яра жап шуко, сандене молан тӧчен ончаш огыл манын шоналтышым. Вет мый марий-влак коклаште кушкынам, марий ансамбльыште пашам ыштенам. Марий тӱвыра алан мыланем лишыл. Тыге «Кече лектеш, ончалеш» мурылан у семын йоҥгалтше аранжировкым ышташ тӱҥальым. Вара тиде мурылан клипым войзышна. Кызыт мый кок у мурым ямдылем. Икымшыже ача-ава, шочмо кундем, йоча пагыт нерген, весыже йӧратымаш темылан пӧлеклалтеш.
– Марий мурын шке ойыртемже уло. Семым возымо годым тидым шотыш налат мо?
– Мыланем марий муро йӧршын палыдыме огыл. «Марий Эл» ансамбльыште пашам ыштымем годым тудын ойыртемже, сылнылыкше чонышкем шыҥеныт. Тыгодымак шочмо татар калыкемынат семже лишыл. Сандене мурым возымо годым нунын ойыртемыштым шотыш налам.
Кызытсе жапыште Интернет лаштыклаште моткоч шуко у муро кажне кечын гаяк лектеш. Палыме да палыдыме, кугу опытан да шукерте огыл гына мураш тӱҥалше еҥ-влак калык ончыко шке мурсаскаштым лукнешт. «Молан татар рвезе марла мура? Шкенан мурызына-влакат ятыр улыт» манын кертыт южыжо. Тиде йодышым Эльфислан пуэнам. «Марий эстраде ынде шуко жап ик верыштак тошкыштеш. Мыйын тушко ала-мом уым пуртымо шуын. Тек марий мурым кумда элна мучко палат. Кузе ме, йот йылмым палыде, вес калыкын мурыжым колыштына, мемнанат мурынам тыге колышташ да йӧраташ тӱҥалышт», – вашештыш тудо.
«Кече лектеш, ончалеш» мурын соцкыллаште лекмекыже, чыным ойлаш гын, мыйынат тыгай йодышем шочын. А вара Эльфисын у мурыжлан почеламутым келыштараш темлышт. Кокытеланымашат лийын: вес калык гыч лекше рвезе марий мурым мурышаш мо? Эльфис дене палыме лиймеке, тудын калыкнам, тӱвыранам йӧратымыжым шижмеке, мый мурылан мутым возаш кӧнышым. Тыге «Лий пеленем», а варажым «Айда, йолташ» муро-влак шочыч. Тиде кечылаште рвезын Йошкар-Олашке толын кайымыже тудлан эшеат сылнырак мурым возаш у шӱлышым пуртыш. Тугеже ончыкыжымат Эльфис Гараев деч у мурым вучаш тӱҥалына.