Марий тӱвыра кече
Дӧртыльӧ районышто марий-влак шукын огытыл гынат (6% утла гына), нуным сайын палат, аклат, пайремлашке марий номер-влакым пуртат. Кажне ийын районысо ик марий ялыштыже эртаралтше пайрем «Марий тӱвыра кече» лӱмым нумалеш, но сценыште татаржымат, пошкыртшымат, рушыжымат ужат.
Ты пайремын историйже 2009-ше ийыш пӧртылта. Тунам (куанен шарналтем) Чарлакыште «Тукымвож пайрем» эртыш. Ты пайремлан кӧра ял койын ылыж каен ыле – шукын архивыште шке ял, тукым дене кылдалтше оҥай материалым пургед луктыч, икмыняр «нӓсылым» (тукымым) муыч, тукымвож пушеҥге-влакым ыштыльыч. Тидым сайлан шотлен, пайремым йӱлаш пурташ шонымо да моло марий яллаштат тыгай мероприятийым ышташ пунчалме. Идалык эртымеке, тыгаяк пайрем Йывачъялыште «Марий тӱвыра кече» лӱм дене эртыш, да умбакыже тиде лӱм эрелан кодо. Пайрем радамыште тӱҥ верым икмыняр ий тукымвож налын гын, пытартыш жапыште тидын деч кораҥыч.
Пура пуш, пура таш
Йывачъялыште марий тӱвыра кече Тӱнямбалысе фольклориаде годым эртыш. Пайремыш толшо уна-влакым, а тиде районысо администрацийым, тӱрлӧ ял гыч коллектив-шамычым, пошкудо районла гыч ушнышо-влакым, ялын шочшыжо да пайремым ончаш толшо-влакым тысе «Калык сем» фольклор ансамбль вашлие. Мелнам да пурам тамлен ончымеке, пайрем гӱжлаш тӱҥале.
Марий тӱвыра кече кажне ийын ик семын ок эрте. Ты пайремыште тӱрлӧ конкурс лиеда. Тыге, мутлан, тӱрлӧ ийлаште «Тукымвож пушеҥге», «Ешемын историйже», «Эн мотор урем», «Эн уста йоча коллектив», «Эн тале кидмастар» да молат лийыныт. Йывачъялыште гын тений пурам шолтышо-влак таҥасеныт.
Конкурсыш ушнышо-влак, сценыш лектын, тӱрлӧ рецепт дене палдарышт. Колыштат да ӧрат! Мыняр тӱрлӧ семын пурам шолташ лиеш улмаш…
«Пура пуш, пура таш» конкурсышто 3-шо верым Миядык да Чарлаклан пуышт, 2-шо верыш Йывачъял лекте, икымше верым Елтек нале (рецептым 15 лаштыкыштына лудса). Саламлена!
Пайремлан кажне ял кидмастар-влак ончерым ямдылен. Тидымат аклен, сеҥышым палемдышт. Мо оҥайже, шкешотан пьедесталыш кӱшнӧ палемдыме ял-влакак логальыч. Кумшо верым адакат Чарлак ден Миядыклан пуышт, а теве кокымшо да икымше шотышто ойлаш гын, нуно верышт дене вашталтыч. Тиде гана эн кӱкшӧ акым пайрем оза-влак айлышт!
Тичмашнек статьям 18 июньышто лекше номерыште лудын кертыда.