Татар йоча-влакат марий йылмым йӧратат

Шукерте огыл Морко кундемысе Кужер тӱҥ школышто этнокультур предметлам туныктышо-влакын методушем погынышт онлайн эртаралте.

Районысо кажне школ гыч урокым ончен кертынна. Урок деч ӧрдыжысӧ пашам, Кужер школысо туныктышо-влакын марий йылмына деке шинчаончалтышыштым, руш ден татар икшыве-влакын мемнан шочмо йылмына деке кумылыштым – чылажымат тора меҥге гоч ужмо да куаныме.

Кужер школым ынде ятыр ий Н.И.Игнатова вуйлата. Надежда Изосимовна шкежат марий йылме предметым вӱда. Тыге тудо кум тӱрлӧ йылме дене кутырышо калыкын икшывыштым иктыш ушен, мемнан шочмо йылмына руш да татар дене ик радамыште шогымыжым йоча шӱм-чоныш шыҥдара.

Н.Игнатова 9-ше классыште кугыжаныш марий йылме дене «К.Васин – энциклопедий шинчымашан айдеме» урокым эртарен. Урок жапыште йоча-влак тынар пайдале шинчымашым налыт, ончыкылык илышыштыштат кӱлеш лийын кертеш. А туныктышым ӱдыр-рвезе-влак тыге тӱткын колыштыт, пуйто ты классыште ик урок жаплан руш йочажат, татарла кутырышыжат марий еҥыш савырна.

Умбакыже 11 мартыште лекше номерыште лудса.

Елена ГРИГОРЬЕВА.
Морко район.