Звенигово район Ташнур ялысе тӱвыра пӧртлан тений 50 ий темын. 11 ноябрьыште клубышто лӱмгечылан пӧлеклалтше пайрем кас куатлын эртен. Лӱмгече дене саламлаш толыныт, пӧлекым кучыктеныт.
Леведыш уда
Тӱвыра пӧртым 1972 ий 7 ноябрьыште почмо. Тиде жап гыч тачысе кече марте шуко паша ышталтын, тӱвыра паша тӱзланен. Но леведышын леведышын уда улмыжо ятыр ий кумылым волта.
– Тудым шифер дене леведме да тетла ик ганат вашталтыме огыл. Кертмына семын ачалена. Леведышым огына вашталте гын, тӱвыра пӧртна пыта.
Тӱвыра пӧртна кермычан, тудым газ дене ырыктена. 2016 ийыште «Эн сай тӱвыра пӧрт» семын окса полышым пуышт. Туддене пластик окнам шындышна. Ӱмаште, оралтым олмыкташ манын, «Единый Россий» партий 60 тӱжем теҥге оксам посна программе дене ойырен. Туддене сценым олмыктенна, тушто линолеумым шаренна.
Тӱвыра пӧртыштӧ шуко жап тыршем. «Эн сай тӱвыра пашаеҥ» премий дене палемдалтынам. Ты оксам чыла пашашке колтенам, тӱрлӧ семӱзгарым налынам, – мане А.Дружинин.
Алексей Николаевич Ташнур кундемыштак шочын-кушкын. Тӱвыра пӧртым 11 ий вуйлата, «Алан» фольклор ансамбльлан вуйын шога. Коллективыште тӱрлӧ ийготан 21 еҥ тырша. Тыгак «Изи шӱдыр», «Шонанпыл» йоча коллектив-влак, «Солнышко» клуб да молат улыт.
Пайрем кас
Пайрем программе поян лийын. Тӱвыра пӧртысӧ фойеште тӱрлӧ фотовыставке куандарен. Тушто клубын эртыме корныжым почын пуымо, «Алан» калык фольклор ансамбль дене палымым ыштыме. Тыгак Провой кундемыште илыше еҥ-влакын чийыме вургемыштым посна ончерышке чумырымо лийын.
Еҥ-влаклан тӱвыра пӧртын историйже, тӱрлӧ жапыште тыршыше-влакын надырышт нерген каласкалыме видеом ончыктеныт. Концертым Морко район Кӱчыкэҥер ялысе «Муро сем» коллектив, Волжский районысо «Упшер кундем», Чакмарий селасе «Ностальгия» да моло коллектив сӧрастареныт. Вара этнодискотеке лийын.
Пайрем кас шуко еҥым куандарен. Чыланат, ик еш семын погынен, эртыше пагытым шарналтеныт, жапым веселан эртареныт. Ташнур тӱвыра пӧртлан умбакыжат пеледалташ, тӱзланаш, тушто тыршыше-влаклан тыгаяк чолга кодаш тыланем.
