Татьяна Попова, дизайнер:
– Тӱрлӧ рецепт почеш кексым ямдылаш келша. Тидлан телылан кылмыктыме емыжым, фруктым але свежа пакчасаскам кучылтам. Кызыт, мутлан, кавун шуко уло. Тудын денат кавун кексым ышташ лиеш. Кӱлыт: 300 г тыгыде тёрко гоч нӱжымӧ кавун, 2 муно, 120 г сакырложаш, 100 мл нӧшмӱй, 220 г ложаш, 1 изи совла кочмо содо да тынарак разрыхлитель, пел изи совла корице, 50 г тыгыдемдыме грецкий пӱкш да тынарак изюм, 1 чывыштыш шинчал.
Муныш шинчалым пыштыман да миксер дене лугыман. Тушко сакырложашым, нӧшмӱйым ешарен, сайын пудыратыман. Посна мискыш ложашым, корицым, разрыхлительым, кочмо содым пырля варыман. Тудым муно вартыш дене эркын ушен пудыратыман. Тушкак нӱжымӧ кавуным, тыгыдемдыме пӱкшым, изюмым ешарыман да сайын лугыман. Ямде руашым, салмаш але формыш пыштен, 180 градус марте ырыктыме коҥгаште 50 минут але утларак кучыман. Кӱын шумыжым пӱйым эрыктыме паҥга але шырпе пырче дене тергыман.
Анастасия Эманова, журналист:
– Мый шӧр-торык гыч ыштыме тӱрлӧ кочкышлан кумылан улам. Мӧҥгысӧ торык дене сырник пеш тутло лиеш. Тидлан пел кило торык, 1 муно, 4 кугу совла сакырложаш, ик чывыштыш шинчал, тынарак содо, кум кугу совла ложаш, тамлан ик чывыштыш ваниль кӱлыт. Эн ончыч торыкыш сакырложашым, шинчалым, муным пыштем да сайын туржам. Вара моло ингредиент-влакым ешарем. Ямде вартыш гыч тыртыш-влакым келыштарем да салмаште жаритлем. Сырник пуштыртатыше да чевер лийже манын, манный шӱрашыште кок могырымат пӧрдалыктем. Сырникым сгущенный шӧр, ӱмбал але варенье дене кочкаш лиеш.
Христина Александрова, журналист:
– Тений кеҥежым мӧҥгысӧ лумэгерчым икымше гана ыштен онченам. Тидлан 33 процентан 350 мл шӧрӱмбал (сливки), 250 мл шӧр, 100 г сакырложаш, 3 муно, ванилин кӱлыт.
Муношым муноптем деч ойырена, сакырложаш да ванилин дене варена. Шӧрым шолаш пуртена да ик жаплан тул гыч кораҥдена. Тушко ямдылыме вартышым опталына. Уэш изирак тулышко шындена да, эркын варен, нугыдеммеш кучена, но шолаш огына пурто. Ямде лиймеке, йӱкшыктарена. Тыгодым шӧрӱмбалым, ӱмбал гай лиймешке, миксер дене лугена. Сливкыш шӧран, муноптеман вартышым ешарен, сайын лугена. Формылашке опталын, морозильникыш ик шагатлан шындена. Тылеч вара уэш миксер дене лугена да йӱштӧ верыш кылмымешкыже кораҥдена.