Марий Элыште шошо призыв тӱҥалын. 4 апрельыште эртаралтше пресс-конференцийыште Марий Эл Республикын военный комиссарже К.А.Солодовник тудын ойыртемже нерген каласкален да журналист-влакын йодышыштлан вашештен.
Шошо призыв специальный военный операций дене кылдалтын огыл, молгунамсе семынак тудо законышто палемдыме сроклан да планлан келшыше лиеш. «Призывник ден нунын ача-аваштлан каласыме шуэш: призыв деч лӱдман огыл, но тудлан ямдылалтман. Военный службыш налме рвезе-шамычлан службо годым воинский коллективыште шке верым муаш да боевой подготовкышто кӱкшытыш шуаш тыланем», – ойлен военный комиссар.
Тенийысе шошо призывыште (апрель-июль) 1994-2006 ийлаште шочшо 800 наре самырык еҥ Шочмо эл ончылно шке порысшым шукташ кая. Нуным Ленинградысе да Москосо военный округласе частьлаш 15 апрель гыч колтат. Тылеч вара вич тылзе жапыште кызытсе военный технике дене палыме лийыт, военно-учётный специальностьым налыт да военный подготовкылан келшыше войскалаште порысыштым шукташ тӱҥалыт. Ешан, илалше але черле ача-аван призывник-влакым торашке служитлаш огыт колто.
Авторын фотожо.