22 апрельыште Марий тӱвыра рӱдер Йошкар-Оласе «Отечествын Геройжо-влак» музейно-патриотический рӱдерыште «Ший талешке» республикысе шымлыме паша-влак конференцийым эртарен.
Тушко 16 участник ушнен. Икте Кугу Отечественный сарыште лийше кугезе кочаже дене палдарен, весе СВО-н ветеранже-влак нерген каласкален. Мо куандарен, чыла участник шымлыме пашажым марла возен да шочмо йылме дене каласкален.
– Кугу Отечественный сар годым элыштына «Чылажат сеҥымаш верч! Чыла – фронтлан!» лозунг дене илыме гын, сар деч вара – «Нигӧ огеш мондалт, нимо ок мондалт» шонымаш дене. Шижалтеш, ӱдыр-рвезе-влак шымлыме пашашкышт чоныштым пыштеныт. Нуно шке кочашт, ковашт, ачаже, изашт, чӱчӱшт дене, икманаш, марий герой-влак дене кугешнат», – каласен Марий тӱвыра рӱдерын директоржо Александр Васильевич Бирюков.
Кажне паша ойыртемалтын. Йоча-влак шымлаш веле огыл йӧратат, почеламутымат возаш да лудаш уста улыт. Теве Морко посёлкысо 2-шо №-ан кыдалаш школышто тунемше Регина Григорьева ден Медведево район Руэм школышто шинчымашым погышо Варвара Долонина шке возымо почеламутышт дене жюрим сымыстареныт. Нунылан поэтессе, жюри член Зоя Дудина посна книга пӧлекым кучыктен.
«Учёный семын шонен моштышо, ала ончыкшым пӱрымаш тудым МарНИИ-ш пашаш конда», – ойлен Морко посёлкысо 2-шо №-ан кыдалаш школышто тунемше Вероника Петрова нерген историй науко кандидат Сергей Свечников да ӱдырын «Куэ ӱмылыштӧ: сар историй да еш шарнымаш» пашажым моткоч сай манын палемден да ятыр книгам пӧлеклен.
«Саскавий» марий ӱдырамаш мер ушемын еҥже Галина Байкова «Ший талешке» конференцийын чыла участникшылан пӧлекым ыштен. Тудо Кугу Отечественный сарыште сеҥымылан 80 ий темме лӱмеш «Марий ӱдырамаш – Кугу сарын тулыштыжо» фотоальманахым ямдылыме нерген ойлен. Ӱдырамаш ушем тидлан келшыше материал-влакым вуча манын каласен. Альманахлан йӧршӧ ик материал конференцийыште йоҥген. Морко посёлкысо 2-шо №-ан школышто ИКН-ым туныктышо Любовь Сергеева У Торъял кундемын шочшыжо, сарыште медшӱжарлан ыштыше Мария Ивановна Демидова (Петухова) нерген шымлыме пашам возен.
Конференцийыште участник-влак коклаште лач ик рвезе лийын. Марий Турек район Арбор тӱҥ школышто 9-ше классыште тунемше Илья Семёнов «Изам дене кугешнем» материалым ямдылен. Тудын Олег изаже кызыт специальный военный операцийыште тыныс илыш верч кредалеш. Илья мучашлан тыге мане:
– Мыйын изам – герой, мемнам аралыше. Кыдалаш Григорий изамат визымше ий контракт почеш служитла. Жап шуэшат, мыят, шке илышем армий дене кылдем, Шочмо элнам аралаш тӱҥалам!
Патриотизм шӱлышеш кушшо йоча кызытак ончыкылык илышыжым военный паша дене кылдаш шона.
«Ший талешке» уста, ушан, шонен моштышо марий йоча-влакым чумырен. Жюрилан сеҥыше-влакым ойыраш неле лийын. Ик йочат пӧлек деч посна кодын огыл, чылаштым, ийготым шотыш налын, призовой вер-влак дене палемденыт.