26 апрельыште Марий талешке кечым Советский районыштат пеш сайын эртарышт. Кечывал деч ончыч посёлкысо Каныме рӱдерыште районысо марий онаеҥ-влак погыненыт, ӱжмӧ уна-влакат лийыныт.
Онаеҥ-влак пытартыш жапыште шуктымо пашаштым иктешленыт, ончыкылыклан паша радамым палемденыт, Советский кундем гыч улшо тале марий-влакым шарналтен уштеныт. Поэт Г.Сабанцев-Ояр тиде кечылан келшыше почеламутшо-влакым лудын, историй науко кандидат Н.Попов Марий талешке кечын шочмыжо, калыкнан йӱлашкыже пурымыжо нерген радамын каласкален. Вара чыланат рӱдер ончык вераҥдыме чап кӱ воктек лектыныт, адакат марий талешке-влакым шарнен, вуйым савеныт.
Кечывал деч вара районысо тӱвыра пӧлкан автобусшо дене ятыр уна, кумылан-влак Оваснур кундемыш экскурсий дене каеныт. Тидлан ты кечын чолга марий Г.И.Мичеев кугун тыршен. Оваснур кундемыште пӱртӱс шке шотан, сылне. Ожно тыште кугу чодыра озанлык лийын, Кундыш эҥер дене кожлам волтеныт. Тунамсе пагыт нерген ынде кодшо олмо-влак гына шарныктат. Районысо тӱвыра пӧлка ты верышке экскурсий дене калыкым кондышташ паша радамым палемден, лӱмынак проектым ыштен да тӱвыра министерстве тудым илышыш пурташ оксам ойырен. Лишыл жапыште тиде верыште мо лийшаш нерген уна-влаклан тӱвыра пӧлкам вуйлатыше Я.А.Ефремов каласкален. Икымше кугу мероприятий Оваснур кундемын исторический манме ты вершӧрыштыжӧ 21 июньышто лиеш. Тиде кече, марий кечышот почеш, – Вӧдыр кече, кунам тоштыеҥым пагален шарналтат; адакше Кугу Отечественный сар тӱҥалме водо. Сандене Советский районысо тӱвыра пашаеҥ-влакын шонен пыштыме сомылышт пеш лачеш лиеш.
Геннадий Сабанцев-Ояр