Волжский район Памар селасе «Пересвет» спортивно-патриотический клубын спортсменже Иван Козлов Озаҥыште греко-римский кучедалме турнирыште ойыртемалтын. Тудо 51 кг марте нелытан категорийыште ӱчашен. Финалыште таҥасыше еҥым 9:1 счёт дене сеҥен.
Таҥасымаште 18 ияш марте 153 спортсмен участвоватлен. Нуно Ульяновск, Оренбург, Самара областьла, Татарстан, Удмуртий, Марий Эл республикла гыч миеныт. Соревнований тӱнямбал классан мастерым, РСФСР-ын сулло тренержке Х.Ш. Тимашевым шарныме лӱмеш эртаралтын.
Иван Козлов ятыр гана Российысе чемпионатлаште сеҥен. Тудын тренерже-влак — А.П. Сергеев ден Н.И. Козлов.
Фото Марий митрополийын сайтше гыч.