Ты кундем 2023 7 августышто эше ик салтакым пытартыш корныш ужатыш. СВО-што Михаил Валерьевич Михайловын ӱмыржӧ кӱрылтын. Миша спецоперацийыш шке кумылын каен. 2022 ий октябрь гыч Луганск областьыште тушман-влак ваштареш кредалын.
Тудо 1981 ий 15 августышто шуко шочшан ешыште шочын, икымше йоча лийын. Ача деч посна кодшо эргылан суртышто пӧръеҥ сомыл шагал огыл логалын. М.Михайлов Шордӱр школын ик эн тале спортсменже улмаш. Тудо ече дене талын, чолган куржталын.
Ӱмыржӧ мучко спорт Миша дене пырля лийын. Ешаҥмекат, школышто тунемше-влакым ече дене куржталаш кертмыж семын кумылаҥден шоген, шкешотан мастер-классым эртарен, моштымашыж дене палдарен. Шке икшывыже-влакымат тидлан туныктен. Мишан кум йочаже кушкеш. Изи Кушна йыр ечыгорно эреак лийын, тудым Михаил Валерьевич тошкен. Вара икшыве-влакын коштмыштым куанен эскерен.
Тудын поро, кӱлеш годым кеч-кӧланат полшаш кумылан улмыжым ялысе калык тачат шарна. Тыгай койышыжланак кӧра Мишам ялын старостыжлан сайленыт ыле. Шке пашажым моткоч ответственно шуктен. СВО-ш кайымыж годымат тудым ятыр еҥ ужаташ толын, илыше пӧртылмыжым вучен…
2023 ий 9 июльышто Миша ешыж дене пытартыш гана кылым ыштен. Ты кечын тудо кандаш ияш Анелия ӱдыржым шочмо кечыж дене йыҥгыртен саламлен. А 16 июльышто Михаил Валерьевичын ӱмыржым тушманын снарядше кӱрлын манын, ойган увер толын. Тидын нерген пырля служитлыме йолташыже-влак ешыжлан увертареныт. Ялыште увер вашке шарлен, но аван, пелашын, йоча, йолташ, пошкудо-влакын тидлан нимынярат ӱшанымышт шуын огыл.
Михаил Валерьевичым пытартыш корныш ужаташ моткоч шуко еҥ погынен, тора кундем гычат лӱмынак ятыр еҥ толын. Тудын Валентина пелашыже кум йоча дене шкет кодын. Колымекыже, Михаилым Патырлык орден дене палемденыт. 2023 ий 12 октябрьыште Михаил Валерьевичын пашам ыштыме верыштыже шарныктыш оҥам почыныт.
Моткоч ӱшаныме шуэш, спецоперацийыште мемнан тыныслыкна верч вуйым пыштыше кажне салтакын лӱмжӧ калык чонышто илаш тӱҥалеш. Кумда элнам аралымаште марий рвезе-влакат лӱддымылыкым, патырлыкым ончыктат. Садлан нуно мыланна ГЕРОЙ улыт!
КУШНА ЭРИК.
М.Михайловын альбомжо гыч налме фото.