Удмуртийысе Грак район Марий Возжай ялеш шочшо Н.Н.Ямаковлан тений 1 январьыште 75 ий темын. Тудым Одо кундемыште да Ижевскыште илыше марий-влакым иктеш ушен шогышо мер пашаеҥ семын палена.
Удмурт Республикысе тӱвыран сулло пашаеҥже (2013) Николай Иванович Ямаковын илышыже оҥай да шкешотан. Тудо чолгалыкым изинек ончыктен. Кум шочшан ачаш да куд уныкан кочаш савырнен гынат, уш-акылжым тӱрлӧ паша дене пудырата.
Туныктышо корно дене…
Колькан кок ияшыж годым ачаже Алнаш район Удмурт-Гондырево ялыш школ директорлан каен, сандене Ямаковмыт пошкудо Маскаялыш илаш кусненыт. Ешыште шым йоча кушкын. Николай эн кугу лийын. Колька Маскиял тӱҥалтыш да Удмурт-Гондыревысе кандашияш школышто тунемын. Тӱрлӧ мероприятийыш ушнен, пионер дружинын председательже лийын. Районысо конкурслаште, спорт таҥасымашлаште призовой верлам наледен. Кушташ-мураш йӧратен, баяным шоктен, ното грамотым палаш да фотом ышташ тунемын.
1993 ийыште Можга педучилищыш тунемаш пурен. Туштат хорышто мурен, училищын оркестрыштыже баяным шоктен. Фото ден литератур кружоклаш коштын, училищысе газетын фотокорреспондентше да «Ленинское знамя» райгазетын внештатный корреспондентше лийын. Спортланат жапым муын. 1996 ийыште 100 метрым куржмо эстафетыште командышт Можга олаште рекордым шынден. Ешыште окса чӱдылан кӧра Николай нылымше курсышто тунеммыж годым кочмывер трестыште художественный самодеятельность коллективым вуйлатен.
Умбакыже — «Кугарня» газетыште лудса (13 январьысе номер).