Кодшо шуматкечын кастене лийше кӱдырчан йӱр, тӱтан мардеж Марий Эллан кугу эҥгекым конденыт.
Яльчик ер воктене, «Таир» каныме базыште, «Марий чодра» национальный паркыште мардеж поснак виян лийын. Автомашина, каныме пӧрт, палатке-влак ӱмбак пушеҥге-влак йӧрлыныт. Электротул воштырым кучышо бетон меҥге-влакат камвозыныт. Тидлан кӧра каныме базылаште йоча лагерьлаште тул ден вӱд лийын огытыл.
Россий МЧС-ын Марий Элысе тӱҥ управленийын службыжо-влак эҥгекым кораҥдаш вигак пижыныт, Россий МЧС гычат техникым, еҥ-влакым колтеныт. Верысе калык полшаш миен. Марий Эл Правительстве Председательын икымше алмаштышыже М.Васютин эҥгек лийме верыш йӱдымак миен.
Эмганыше еҥ-влакым Волжск оласе эмлымверыш наҥгаеныт. Шке семын, палаткым вераҥден каныше-влак эҥгекыш логалыныт.
Яльчик ер воктене 27 еҥ сусырген, кандаш еҥ колен. Нуно чылан Татарстан Республик гыч лийыныт. Таир ер воктене кум еҥ эмганен.
Шуматкечын Марий Элын моло районыштыжат тале мардеж озаланен. Курыкмарий районышто шолем лийын, Йошкар-Олаштат шуко пушеҥге йӧрлын.
1 августышто Марий Эл Республик Правительстве Председательын алмаштышыже С.Воронцов правительственный комиссийын чрезвычайный ситуаций шотышто черетан заседанийжым эртарен. Тушто тале мардежлан да йӱрлан кӧра лийше эҥгекым кораҥдыме шотышто могай паша ышталтме нерген ойленыт.
С.Воронцов эҥгекым кораҥдыше чыла службын сай пашажым палемден. Объектлаште электротулым уэш пуаш тӱҥалме. Социальный объектлам, пӧртлам ачалат, чодыра корнылам эрыктат.
Марий Элым Вуйлатыше Ю.Зайцев 29 июльышто лийше туткарлан кӧра эҥгекыш логалше еҥ-влаклан ик гана тӱлыман окса полышым пуаш палемден.
Колышо-влакын ешыштлан 1 млн теҥгем тӱлат. Тазалыклан эҥгек лиймым да сусырым шотыш налын, эҥгекыш логалше-шамычлан 50 гыч 500 тӱжем теҥге марте тӱлат.
Оксам республикысе бюджет гыч ойырат. Выплате шотышто уверым Паша да калыкым социально аралыме министерстве пуа.
Тале мардежлан кӧра эҥгекыш логалше-влаклан Марий Элысе прокуратурын «шокшо линийже» пашам ышта.
8(8362) 56-61-02, 8(8362) 68-71-17 номеран телефон дене кажне паша кечын 9 гыч 13 шагат марте да 13 шагатат 45 минут гыч 18 шагат марте йыҥгырташ лиеш. «Шокшо линийыш» тӱтан мардежын кондымо эҥгекше дене палдараш, тидын шотышто федеральный законым пудыртымо нерген 11 август марте йыҥгыртен каласаш лиеш.