Тале химик

 

 

Шукерте огыл школлаште тунемше-влакын чыла предмет дене олимпиадын лектышыже пале лийын.

Апрельын пытартыш кечынже Йошкар-Оласе 28-ше №-ан школышто региональный ден всероссийский олимпиадыште сеҥыше ден призёр-влакым саламлыме мероприятий эртаралтын.

Региональный олимпиадылаште сеҥыше 36 йочалан чап грамот ден медальым пуымо. Тышеч вич тунемшыже технологий, географий да химий дене всероссийский олимпиадыште сеҥен. Кумытын I степенян дипломым налыныт, а коктын призовой верыш лектыныт.

Химий дене олимпиаде Белгородышто лийын. Тушто У Торъял кыдалаш школын 11-ше классыштыже тунемше Григорий Ложкин 280 гыч 164,25 баллым поген да призёр радамышке логалын.

«Григорий 8-ше классыште химийым утларак келгын тунемаш тӱҥалын, – ойла тудын нерген У Торъял кыдалаш школышто химийым туныктышо Лилия Глушкова. – Григорий дене «Одаренные дети. Химия» программе почеш тунемынна да 2018 ий годсек олимпиадылаште участвоватленна. Рвезе Медведево районысо Руэм посёлкышто верланыше Уста йоча-влак дене пашам ыштыше рӱдерын лагерьыштыже лийын ыле. Тылеч варат кажне кечын педагог дене пырля тунеммылан да ача-аван полышыжлан кӧра тыгай лектышыш шуынна. Григорий 10-шо ден 11-ше класслаште всероссийский олимпиадын региональный этапыштыже сеҥен ыле».

Каласыман: всероссийский олимпиадыште сеҥыше да призовой верым налше ӱдыр-рвезе-влак ты профильный предмет дене вузлашке экзамен деч посна пурат. Республикна гыч тыгай пиал  тений вич тунемшылан логалын.

 

Эльвира Терентьева.