Март кыдалне Параньга район Олор ялыште физкультурым туныктышо, опытан тренер, тале ечызе Н.К.Фадеева лӱмеш ече таҥасымаш эртаралтын. Тушко Матародо, Кугу Пумарий, Элнет, Олор, Марий Турек школла гыч тунемше, Морко, Шернур районла, Йошкар-Ола гыч спортсмен-влак ушненыт.
Надежда Константиновна Олор ялеш шочын-кушкын, тыштак ешым поген, кум шочшан ава лийын. Спорт тудын илышыжым тӱзатен, ончыко вӱден, Олор школын чапшым тудо шуко гана нӧлтен. Тудым тале ечызе семын палат. Районысо, республикысе, Юл кундем федеральный округысо таҥасымашлаште поснак ойыртемалтын. Тудын кӱкшӧ сеҥымашыже-влакым таче медаль, значок, грамотыжо-влак пеҥгыдемдат.
Н.К.Крупская лӱмеш Марий пединститутышто физкультурым туныктышылан тунем лектын. Паша корныжо Параньгасе Йоча спорт школышто тӱҥалын. Тушто тренерлан 15 ий ыштен, Олор школыштат физкультурым ятыр ий туныктен. Поро кумылан, весела да моткоч писе лийын. Шке пашажым йӧратен, йоча-влакым спортлан кумылаҥден шоген. Илаш гына ыле. Но кум ий ончыч тудын ӱмыржӧ кенета кӱрылтын. Тудын лӱмжым Олор ялыште илыше еҥ, туныктышо, йоча-влак порын шарнен илат, паша лектышыжым кӱкшын аклат.
Н.К.Фадеева (ӱдыр фамилийже – Степанова) лӱмеш ече таҥасымашым ынде кумшо ий эртарат. Ты пашам вораҥдарен колташ родо-тукымжо, туныктышо-влак полшеныт. Таҥасымашыш 97 еҥ ушнен. Эн изи ечызе вич ияш лийын гын, эн кугу – 77 ияш. Ийготым шотыш налын, участник-влак тӱрлӧ кужытышто таҥасеныт.
Сеҥыше ден призёр-влаклан медальым, кубокым, грамотым кучыктеныт.
Морко район Унчо села гыч тений таҥасымашыш вич спортсмен толын. Нунын кокла гыч иктыже – тале ечызе Вениамин Хмелев (снимкыште). Тудо 1-ше вер дене палемдалтын.
– Тыште ынде кокымшо гана таҥасем. Ӱмаштат толынам ыле. Организатор-влак молодец улыт, чот тыршеныт. Сандене пеш кугу таум ойлем.
Тыгай таҥасымашын кӱлешлыкше кугу. Тидыже йоча-шамычын тазалыкыштым пенгыдемдаш полша. Вес ийынат тышке толаш кумылем уло, – мане тудо.
Таҥасымаш сайын, кӱкшын эртаралтын. Тыгодым игечат куандарен, ечызе-влакат кумыл нӧлтшӧ кодыныт. Сандене ончыкыжымат тыгай таҥасымашым эртараш тӱҥалыт манын ӱшанена.
Е.Бирюковын фотожо-влак.