26 апрельыште тӱрлӧ вере Марий талешке кече эртаралтын.
Вуйым савеныт
Йошкар-Олаште 7 шагатлан марий-влак марий сылнымутын классикше С.Г.Чавайнын памятникше воктене погыненыт. Нуно талешке-влакым шарналтен ойленыт. Еҥ-влак Йошкар-Олаште моло талешкынат шарнымаш оҥашт да чапкӱшт воктеке пеледышым пыштеныт. М.Шкетан лӱмеш Марий драмтеатрыште тыршыше-влак Шкетанлан вуйым савеныт, журналист-влак – П.Глезденёвлан, Морко да Шернур районлаште шочшо-влак – шке землякыштлан да молат. Тыгак республикысе районлаштат Совет Ушем Герой да талешке-влакым шарналтеныт.
Институтышто
В.М.Васильев лӱмеш МарНИЯЛИ-ште мероприятий учёный В.Васильев-Ӱпымарийын шарныктыш оҥаж воктек пеледышым пыштыме дене тӱҥале.
Варажым В.М.Васильевын шочмыжлан 140 ий темме лӱмеш стендым калыклан ончыктышт. Тудым институтын научный книгагудыжым вуйлатыше Г.Байкова ден кугурак научный пашаеҥ, филологий науко кандидат Э.Пекшеева ямдыленыт. Стенд шуко уверлан да фтокартычкылан поян, учёный нерген книгалам да шкенжынат пашалажым ужына.
Марий талешке кечылан пӧлеклыме «йыргешке ӱстел» «Марий калыкын этногенезше» маналтын. Мутат уке, калыкна нерген палдарымаш кажне пагытыштат кӱлешан. Тушко учёный, тӱвыра да образований пашаеҥ-влак деч посна мер пашаеҥ, краевед, журналист да студент-влак миеныт ыле. Чынжымак, ме историйнам самырык тукымлан каласкалышаш да умылтарышаш улына.
Мероприятийыш марий йылмызын Рюрик эргыжын ӱдыржӧ Елена Рюриковна Зайкова да тукым шольыжо Павел Шакирьянович Кайниев толыныт ыле. Елена мӧҥгыштӧ аралалтше икмыняр фотом конден. Нуно коктынат Йошкар-Олаште илат да лӱмлӧ родыштым жаплат, МарНИИЯЛ-иште эртарыме мероприятийлашке толын коштыт.
«Йыргешке ӱстелыште» ик презентаций да кум доклад лийыныт. Нине шымлымаш паша-влакат марий калыкын ончыкылыкшым волгалтараш полшат.
Эльвира Терентьева.
Авторын фотожо-влак.
