12 октябрьыште Марий Элым Вуйлатышын стипендийжым 59 чолга, уста студент ден аспирантлан кучыктымо. Нунын кокла гыч иктыже – МарГУ-што физический культур, спорт да туризм факультетыште нылымше ий тунемше, тале баскетболист, судья Александр Конков.
Рвезе МарГУ-со «Акпарс» студент-влакын баскетбол сборный командыште модеш, ты вид дене Россий чемпионатыште (кӱшыл лигын) ӱдырамаш да пӧръеҥ команде-влак коклаште судьялан тырша.
Усталык пашам спорт алмаштен
Александр Йошкар-Олаште шочын-кушкын, 7-ше №-ан школышто тунемын. «Импровиз» бальный куштымаш ансамбльыш коштын. Коллектив школлаште, йочасадлаште концертым ончыктен, тора кундемышке лектын коштын. Александр тыгак гитар дене сайын шоктен. Вара рвезе кумылым спорт налын. Тудо баскетболла модаш кумылаҥын.
– Тӱҥалтыш класслаште каратэ дене заниматленам, иймашке коштынам гын, 8-ше класс гыч баскетболла модаш тӱҥалынам. Тидын шотышто Йошкар-Оласе 11-ше №-ан лицейыште тыршыше тренер Сергей Викторович Осипов кугун полшен. Туддеке заниматлаш коштынам. Тренер школысо, тыгак МарГУ-со команде-влак дене пашам ыштен. Варажым эше ик тренер дене шкем шуараш тӱҥальым. Баскетболлан жапым шуко ойыренам, сандене моло секцийышке коштмым чарненам, – мане Александр.
Школышто рвезе чыла шотыштат ончылно лийын, сайын тунемын, школысо тӱрлӧ мероприятийыш, шанче конференцийыш ушнен, тыгак туныктышо-влаклан мероприятий-влакым эртараш полшен.
Баскетболист, судья…
А.Конков, илыш корныжым спорт дене кылдаш манын, 2019 ийыште МарГУ-шко тунемаш пурен. Тыштат тудо моло деч ойыртемалтын. Икымше курс гыч «Акпарс» баскетбол сборный командыште модаш, судьялан ышташ тӱҥалын.
– 10-шо классыште тунеммем годым судьян пашаж дене палыме лийынам. Тунам «Олимп» спорт школын вуйлатышыже Наталья Демкович «КЭС-Баскет» школысо баскетбол лигысе модмаш-влакым эртарен, но тудым аклыше судья ситен огыл. Лач тунам мый икымше гана ты пашаште шкем терген онченам. Вузышто тидым умбаке шуенам. 2019 ийыште регионысо семинарлашке коштын, шинчымашым келгемден, Российысе баскетбол федерацийын арбитрже-влакын спискышкышт логалынам. Марий Эл гыч Российысе баскетбол модмашын лицензированный арбитрже, пӧръеҥ да ӱдырамаш команде-влак коклаште эртыше Россий чемпионатлаште (кӱшыл лигын) судья улам. Кундемыштына тыгай судья лийын огыл, – мане А.Конков.
Кызыт Александр – Санкт-Петербургышто. Тудо ӱдырамаш-влак команде коклаште суперлигыште судья пашам шукта.
А.Конковын ятыр сеҥымашыже уло. 2021-2022 ийлаште Марий Элыште пӧръеҥ-влак команде коклаште студенческий баскетбол ассоциацийын чемпионжо лийын. Марий Элысе чемпионатыште кок гана ший медаль дене палемдалтын, уремысе баскетбол чемпионатлаште шуко гана сеҥыше радамыш логалын.
Рвезе студент-влак дене пашам ыштен мошта. Тудо 1-ше курс гыч группыштыжо старосто.
Стипендиат лияш – кугу куан
Марий Элым Вуйлатышын стипендийжым налаш – тудлан кугу куан да кӱкшыт. Тидын шотышто Александр тыгерак мане:
– Эксперт-влакым ӧрыктараш тыршенам. Нуным судействе пашам дене утларак палдаренам. Чапкагаз дене пырля тыгак судья книжкам, Российысе баскетбол федерацийын лицензийжым да молым аклаш пуэнам. Тыгай стипендийым налмылан куаненам. Марий Эл Правительствын талантан самырык еҥ-влаклан полшен шогымыжо моткоч сай. Тыгай ӱдыр-рвезе-влак шке пашаштым моткоч йӧратат да обществылан кугу пайдам кондат. Тыгай кӱкшытыш шумо дене эше утыр пашам ышташ куат лектеш.
Александрлан умбакыжат тыгак ончыко каяш да кугу сеҥымашке шуаш тыланем.
