И.С.Палантай лӱмеш республикысе тӱвыра да сымыктыш колледжыште тунемше Анна Короткова «Идалыкын студентше» конкурсышто сеҥен. Тудо «Идалыкын творческий личностьшо» лӱмым сулен налын.
«Идалыкын студентше» Российысе конкурсын Марий Элысе этапше ссуз да вуз-влак коклаште посна эртаралтын. Тушто участник-влаклан икмыняр турым эрташ логалын.
Йошкар-Олаште шочын-кушшо Анна Короткова вич ияшак мураш тӱҥалын. Аваже ден ачаже тудым Йоча да самырык-влаклан полатышке коштыктеныт. Ты жапыштак Аня «Голос детства» йоча ушемыш ушнен да «Домисольки» йоча ансамбльын солисткыже семын выступатлен. Тӱрлӧ вере сеҥымашыш шумыжлан музыкылан шӱмаҥдыше Гульнара Мухаметовалан кугу таум каласа. Лач тудын сем тӱняшке мастарын «вӱден пуртымыжлан» кӧра Анна илышыжым усталык дене кылден.
Ӱдыр тылеч посна Йошкар-Оласе 5-ше №-ан йоча сымыктыш школышто «Гитара» классым да «Фортепиано» курсым тунем лектын.
Аня изиж годымак Игорь Крутойын популярный музыка академийыштыже тунемаш шонкален. А вара шке шонымашыжым шуктен: 13 ияш ӱдыр кастингым эртен да Озаҥыште верланыше академийжым тунем лектын. Пошкудо олашке Аня шуматкече еда кок ий кудалыштын. Тыгодымак Муз-ТВ каналын «Битва талантов» телевизионный конкурсыштыжо участвоватлен да финалистке лийын.
2017 ийыште ятыр сеҥымашан ӱдырым «Артек» тӱнямбалысе йоча рӱдерыш колтеныт. Чолга улмыжлан кӧра тудо кок ий гыч адак тушко логалын. «Детская Новая Волна» сменыште шкеж гаяк усталык шӱлышан ӱдыр-рвезе-влак дене пырля мастарлыкшым шуарен, йоча-влакын конкурсыштым ончен.
А.Короткова колледжыште «Сольное и хоровое народное пение» пӧлкаште кокымшо ий тунемеш, Креативный индустрий школышто «Звукорежиссура и электронная музыка» направлений дене шинчымашым пога. Тыгак тений колледжыште «Эстрадный вокал» ден «Музыкальное звукооператорское мастерство» направленийла дене профессиональный переподготовко манме курсыш ушнен. Тылеч посна «Видеоблогер», «PR-менеджер», «Менеджмент в социальных сетях», «Ведущий радио- и телепередач» специальностьла дене тунемаш йодмашым возен. Мутлан, иктыж дене тунеммаш ноябрьыште тӱҥалеш, весыж дене – январьыште.
Умбакыже «Кугарня» газетыште (2022 ий 7 октябрь) лудса.