Таир ер воктене 30 май гыч 1 июнь марте Марий Эл Республикнан туныктымо аланысе профсоюзын президиумыштыжо тыршыше эн чолга еҥ-влакым «Славим человека труда!» X фестиваль иктыш чумырен. Шке шулдыржо йымаке 300 утла айдемым авалтен.
Фестивальын ик тӱҥ шонымашыже: туныктымо тӧнежласе профсоюз ушемын еҥже-влакым у вашталтыш дене палдараш, шинчымашыштым пойдараш да илыш дене тӧр ончыко каяш тараташ. Кум кече жапыште Марий Эл Республикысе туныктымо аланысе профсоюз толкыным вуйлатыше Л.В.Пуртова ятыр лекцийым лудын. Устав, колдоговор, профсоюз пашан вияҥын толмыжо – чылажат пӱсӧ йодыш семын лончылалтын. Людмила Васильевнан вӱдымыж почеш паша кышкарышке ятырын ушненыт.
Морко кундем гыч фестивальыш 15 еҥ ушнен. Делегацийнам Морко районысо туныктымо аланын профсоюз ушем вуйлатышыже В.С.Фёдоров вуйлатен. Валерий Семёнович шкежат илыш дене тӧр ошкылеш. Профсоюз толкынысо вашталтышым, уэм толмашым чыла пален шога. Лач тудын тыршымыж дене Морко кундемын делегацийжат кугу чолгалыкым ончыктен да чап кагаз дене палемдалтын.
Тыгай кугу фестиваль Таир ер серыште кажне ийын эртаралтеш. Лагерьыште лач профсоюз ушем вуйлатыше вел огыл, а кажне туныктымо тӧнежыште але йочасадыште тыршыше профсоюзын еҥже каен кертеш. Погын пеш пайдалын эртен да ончыкшымат у шинчымашым налме амал дене миен толаш кажнын чонышто кумылым ылыжтен да сай шарнымашым коден. Профсоюзын еҥже-влак шке шочшыштым, уныкаштым каналташлан пырля налын кертыныт. Йоча-влаклан посна программе-влак эртаралтыныт.
Елена Григорьева, Морко районысо туныктымо аланысе профсоюз толкын президиумын еҥже.
