«ОСКОЛКО КАПЫШТЕМ…»
«Осколко-влак шыҥеныт чумыр капышкем,
Коржеш кокланже уло могырем».
«Мыняре?» – йылме гыч рудалте йодышем.
«Витле утларак», – вашештыш героем.
«Лу осколкым лукмо, ныллыже ила,
Южгунамже сусыр шкенжым палдара», –
Лӱддымӧ салтак мылам шыпак ойла. –
Ок кугешне, йодышемлан вашешта.
Телефон гоч поро кумылжым шижам,
Шӱм гыч лекше шомаклажым колыштам.
Героемын ойжым, шыҥдарен чонеш,
Мутым кылдыштам, да у статья шочеш.
СВО-што лийше Сергей Воронцов нерген статьям («Лӱддымӧ марий пӧръеҥ», «Кугарня» газет, 16 февраль) возымеке, ушышто тудын шомаклаже шуко жап пӧрдыныт. Сандене нуным почеламут семын возен ончышым.
Шке кумылын спецоперацийыш кайыше пӧръеҥ сусырген толын. Илыш кочым пален кушкын, шкем тӱрлӧ пашаште терген. Кужэҥер район Руш Йошкарэҥер ялыште ала-кунам фермер пашам шуктен, а икмыняр ий ондак посёлко гыч ялыш ешге илаш куснен.
ВЕС ГЕРОЙ НЕРГЕН
Медведево район Краснооктябрьский посёлкышто шочын-кушкын. Эргыжын колымыж нерген уверым колмеке, аваже Елена Ивановна тудын капшым муаш манын, кушко гына йыҥгыртен огыл, мыняр йӱд омыжо кошкен… Эр гыч кас марте телефон дене госпиталь, морг еда кычалын, но иктат вашмутым пуэн огыл. Нимогай уверым палыде илымашым ава шкешотан поргем манын, вет тыгодымсо чон йӧсылыкым да лишыл еҥ-влакын шижмашыштым умылтараш неле…
Варажым Е.И.Чемоданова соцсетьлаште тудын семынак ойгыш вочшо ава ден пелаш-влак дене кылым ыштен. Тыге «Мамы Ангелов войны… Марий Эл» сообществым чумыреныт. Пырля ойгым луштарат, порылыкым шарат, тӱрлӧ сомылым ворандарат. Тыгак Елена Ивановна «Жена Героя. Мать Героя» ончерым чумырымаште шке надыржым пыштен. Кызыт тудым ик район гыч весыш кусарат, кажне вере тудым почмашке вашка.
КӰРЫШТАЛТШЕ СЕМ
СВО-што вуйым пыштыше Павел Чемоданов да тудын аваже Елена Ивановна лӱмеш.
Тылзе наре кычалеш ава шке эргым,
Мыняре йӱдым чылт мал(ы)де ила…
Йыҥгыр почеш йыҥгыр вашлиеш у эрым…
Кӱрышталтше семым йӱк лукде мура…
Чытен лекме кечым шотлымо салтакла.
Рок нумалтыш неле – ик ава пала.
Эрге тудын омыш толын каласалын,
Танк йымалне кодын да туштак кия.
Таче шинчавӱд ден шарналтеш ты пагыт.
Суксо лийын Павел, чоҥештен тораш…
Лӱддымӧ салтак-влак чапым садак налыт!
Кажне йолтошкалтыш нунын курымаш!
Эльвира ЕНДЫЛЕТОВА (ТЕРЕНТЬЕВА).