17 февральыште Порылыкым вучыдымын ончыктымо кечым палемдат. Лудшына-влаклан поро пашам кенета шукташ чӱчкыдын логалеш?
Марина Скуратова, Йошкар-Ола:
– Икшывем дене кажне кечын коляске але издер дене тӱнӧ яндар южым шӱлен коштына. Пандусым чыла вере келыштарыме огыл. Тыгай годым эртен кайыше-влак эре полшат.
Икана велосипед дене кудалше пӧръеҥ, кок ораван транспортшым шогалтен, мыланем коляскым кӱзыкташ полшен. А вара шке пашаж дене умбакыже кудалын. А шукерте огыл, тале поран деч вара, кевыт гыч ошкылшемла, корно гоч вончышо шоҥгыеҥым ужым. Корно воктенысе лум ораш кӱзен, тротуарыш лекташ кӱлын. Лум ораш кӱзен ыш керт да саде коча камвозо. Кынелашыже полшаш шонен, тудын могырыш ошкыльым. Но тиде жапыште эртен кудалше машина шогале, да водитель шоҥгыеҥлан полшыш. Весылан полыш кӱлеш гын, ӧрдыжеш ом код.
М.Скуратован альбомжо гыч налме фото.