17 февральыште Порылыкым вучыдымын ончыктымо кечым палемдат. Лудшына-влаклан поро пашам кенета шукташ чӱчкыдын логалеш?
Мария Тимиряева, Йошкар-Ола:
– Ме кажне кечын иктаж-могай да поро пашам ыштена, но тидын нерген огынат шоналте. Мутлан, автобус гыч лекше ковалан киднам пуэна – тидат полыш. Мыят тыгай ситуацийыш чӱчкыдын логалам. Но тиде тыгакак лийшаш, моктаныман огыл. Шукыж годым тыгай случай-влак мондалтыт. Але, мутлан, уремыште ошкылат, ончет: корно вес могырышто илалше еҥ яклешт камвозын да кынелын ок керт. Тый йӧршеш вес велыш ошкылат гынат, корным вончен, саде еҥлан полшет. Тыгай поро паша эше шарналт кодеш. Полшаш кӱлеш гын, мый, шонкалыде, тидым ыштем. Чаманен каласыман, кызыт ятыр еҥ эҥгекыш логалше еҥ воктеч эртен гына кая. Эре шарныман: иктаж-кунам тыланетат полыш кӱлеш лийын кертеш. Айдеме эре айдемак кодшаш.
М.Тимиряеван альбомжо гыч налме фото.