17 февральыште Порылыкым вучыдымын ончыктымо кечым палемдат. Лудшына-влаклан поро пашам кенета шукташ чӱчкыдын логалеш?
Елена Васильева, Моско:
– Вучыдымын порым ыштыме ушыш ок код, вашке мондалтеш. Метрошто, автобусышто шоҥгыеҥлан, мӱшкыран ӱдырамашлан але икшыван ача-авалан верым пуэм. Кевытыште але эмлымверыште черетыште шогымо годымат нуным ончыко колташ тыршем. Ешна дене СВО-што улшо салтак-влаклан полшена – школ, черке гоч гуманитарный полышым колтена. Социал кылыште черле йоча-влак нерген уверым ужмеке, ӧрдыжеш ом код – оксам колтем (кугу суммым огыл гынат).
Е.Васильеван альбомжо гыч налме фото.