17 февральыште Порылыкым вучыдымын ончыктымо кечым палемдат. Лудшына-влаклан поро пашам кенета шукташ чӱчкыдын логалеш?
Полина Пуртова, Йошкар-Ола:
– Чынак, поро пашам ыштыме тӱрлӧ семын палдырна. Коча-ковалан корным вончыктараш, ала иктаж еҥлан йодышлан вашешташ – тиде икмынярже. Трукышто мыламат полшаш логалын. Икана, пашаш ошкылшемла, ӱдырамаш мый декем тольо да эмлымверыш чын каем мо манын йодо. Но тудо йӧршын вес могырыш ошкылеш ыле, сандене пел корныжым пырляк кайышна, а вара тудлан умылтарен колтышым. Ӱдырамашын каласкалымыж почеш, тудо олаштак ила, но ты велне нигунамат лийын огыл, сандене корным муын огыл. А поро пашам ыштет гын, тудо икмыняр пачаш пӧртыл толеш манын, мый моткоч ӱшанем, сандене оксам погымашкат ушнаш тыршем, поро кумылым ончыктымо концертыштат выступатлем.
П.Пуртован альбомжо гыч налме фото.