Таче тӱнямбалне Тоштерын кечыже палемдалтеш!
Тыгай темлымашым 1977 ийыште Тоштер-влакын тӱнямбал ушемже ыштен. Тыге 1978 ий гыч 150 утла эллаште 18 майым Тоштер кече семын пайремлаш тӱҥалыныт. 2015 ийлан 145 элыште 35000 наре тоштер улмым палемдыме.
Пайрем кечын тоштерлаште «Ночь музеев» акций эртаралтеш. Тушто кумда программым темлат. Мутлан, Марий Эл Республикысе Т.Евссев лӱмеш калыкле тоштерыште «Ночь Музеев – 2020» онлайн-формат дене эртаралтеш. Тоштерын YouTube каналыштыже мастер-класс, экскурсий, лекций да концерт-влак лийыт.
20 шагатлан «Безбашенный концертым» ончаш темлат. Тушто Инна Плешакова, Эльвира Попова, Александр Речкин, Сергей Федонин, Татьяна Емельянова да Антон Савин мурат.
21 шагатлан «Мастерская страха» тренинг эрта. Лӱдмаш кушеч лектеш? Мо деч айдеме лӱдын але лӱдеш? Тыгай йодыш-влаклан вашмутым психолог Ольга Вахонина пуа.
Татьяна Матвеева, Калык прикладной-сымыктыш тоштерын вуйлатышыже:
– Таче кечыгут ме кум виртуальный выставкым ончаш темлена. Нунын кокла гыч иктыже — «Загадки старинного дома». Нине публикаций-влак тоштерыштына 2017-2019 ийлаште эртыше «Ночь музеев» культурный акций-влак нерген каласкалат. Тыгак тоштер нерген виртуальный программым ямдылыме. Ончышо-влакым вучена!
