4 декабрьыште М.Шкетан лӱмеш Марий драмтеатрыште актрисе Наталия Алексееван тыгай лӱман лӱмгече концертше лиеш. Тудын театрыште пашам ыштымыжлан – 10 ий. Наталия мурызо семынат калыклан палыме. Концертыште артисткын репертуарже дене тичмаш палыме лияш да чон дене канаш йӧн пуалтеш.
Йоча годсо шонымаш
Морко район Унчо кундемысе Шӱргӧ ялын шочшыжо Наталия Алексеева изинек артист койышан кушкын. Тудо йочаж годымак артисткылан Москошто тунем лекташ да лач М.Шкетан лӱмеш театрыште пашам ышташ шонен. Юмын пуымо талантше, поро кумылжо да сымыктыш тӱняште шкем шуарымыже шонымашкыже шуаш полшеныт. Эн ончыч Н.Алексеева Йошкар-Оласе И.С.Палантай лӱмеш тӱвыра да сымыктыш колледжын театральный отделенийышкыже тунемаш пурен. Вара пӱрымаш ончыкылык артисткым Москосо М.С.Щепкин лӱмеш кӱшыл театр институтыш конден. Ойырен налме профессийже деч Наталия ик ганат йӱкшен огыл. Тудо шке верыштемак улам манын ойла. Да южгунам тӱрлӧ илыш ситуацийлан кӧра кумыл вола, «муза» манме коден кертеш. Но Наталия пашаштыже чонжо дене кана, тудо шулдыраҥеш. Спектакль, рольжо-влак нерген каласкалымыж годым артисткын шинчаже куан тул дене йӱла.
Характеран рольым йӧрата
Наталия тӱрлӧ жанран спектакльыште модеш. Комедийыштат, драмыштат чоҥымо образшым тичмаш почын мошта. Шыма койышан да шӱргывылышан артистке, поро рольым веле модаш йӧршӧ манын шоналтет. Но Наталия кеч-могай образыш тыманмеш «пурен каен кертеш», да тудлан чынжымак ӱшанет. Теве, мутлан, «Эргымлан кузык» спектакльыште Наталия чоя, темдыме Фифам сайын модын.
Н.Алексееван кажне рольжо шкешотан. Конешне, тыште режиссёрын надырже кугу. Режиссёр артисткын тиде але тудо рольым модын кертмыжым ужын мошта. Мыйын шонымаште, «Ваня чӱчӱ» спектакльыште Наталиян мастарлыкше эн сайын почылтын. Роль неле да келге.
– Антон Чеховын произведенийже негызеш шындыме спектакльыште модаш – кеч-могай артистлан эн кугу пиал да ответственность. «Ваня чӱчӱ» спектакльыште Сонян образшым чоҥенам. Тудо могай лийшаш нерген режиссёр Степан Пектеев дене шуко шонымо. Соня ару чонан, поро, чылам умылышо да чылам чаманыше, тыгодым пиалдыме. Тиде рольлан мыйым тений «Театральный Йошкар-Ола» фестивальыште «Кокымшо планан эн сай ӱдырамаш роль» номинацийыште палемденыт. Кеҥежым Озаҥыште театральный тӱнямбал олимпиадыш ты спектакль дене миенна. Тушто Пошкырт кундемысе артист-влак дене пырля «Ваня чӱчӱ» спектакльым марла да пошкыртла ончыктенна. Нунын денак пырля Санкт-Петербургысо Александринский театрыште ты спектакльым модынна. А октябрьыште М.Шкетан лӱмеш театрнан труппыжо «Ваня чӱчӱ» спектакль дене Кудымкарыште эртаралтше «Сообщение» межнациональный театральный фестивальыште Гран-прим налынна.
Лу ий жапыште шагал огыл ролем лийын, сай деч сайже – эше ончылно, шонем. Музыкальный постановкышто, можыч рок-оперыште, дель арте комедийыште моднем ыле, – каласкала Наталия.
Киноактрисе
Наталия – кок шочшан ава. Йоча дене шинчымыж годым театрышкат ом лек манме шонымаш ушышкыжо пурен. Но тиде лач ик гана лийын. Содыки йоча годсо шонымашыже, театрым йӧратымаш ты шонымашым сеҥеныт. А мыланна, спектакльыш коштшо-влаклан, артисткын модмо рольжым умбакыжат ужаш куан веле. Наталия кызыт шкенжым киноактрисе семынат терга. Тудо ойла:
– Икымше кинопашам марий режиссёр Андрей Огородниковын «Евсеев: признание ценою в жизнь» фильмыштыже лийын. Тушто марий калыкын пайрем йӱлаже-влак нерген шуко палдарыме. Мый вуйым пӱтырышын изирак рольжым модынам. Денис Шаблийын «Ирга» фильмыштыже тӱшка эпизодышто лийынам. Максим Брызгаловын «Матч Акпарса» фильмыште изи эпизодышто модаш ӱжыныт. Тений Унчо кундемын эргыже Валерий Апакаевын возымо ойлымашыже-влак негызеш «Парым» сериалым сниматлыме. Мый тушто изи Валерикын аважым модынам.
Лӱмгече пайрем концерт
Наталия 10 ий театрыште пашам ышта, 10 ий эстрадыште палыме мурызо, тыгак 4 декабрьыште тудлан 35 ий темеш. Тиде кум амаллан кӧра артистке шкешотан иктешлыме концертым эртараш ямдылалтеш. Тидлан шкеак сценарийым возен.
– Концерт мурылан поян лиеш. Пайрем касым уста йолташем-влак Марина Воронцова ден Алексей Юнусов вӱдат. Мый шкетынат, дуэт денат мурым мурем, тыгак мыйын возымо мурем дене артист-влак куандараш тӱҥалыт. «Юкече» йоча коллектив кок мурым мура. Мый мутым возенам, а семжым Светлана Яндукова келыштарен.
Эстрадыш корнем лу ий ончыч Александр Речкин дене пырля мурымо «Шучко ден чевер» муро дене тӱҥалын. Ты мурым сценыште шагал йоҥгалтарыме. Лу ий гыч угыч дуэт дене мураш мылам моткоч куанле, – палдарыш артистке.
Наталия марий мурым, спектакльым йӧратыше-влакым уло кумылын шке концертыштыже вуча. Усталыкше дене сценым волгалтараш, шӱлык кумыл деч утараш ямдылалтеш.
Н.Алексееван архивше гыч налме фото-влак.