Кирилл Николаев Морко район Коркатово лицейыште 11-ше классыште тунемеш. Чолга рвезе ятыр мероприятийыште шкенжым терга, тӱрлӧ таҥасымаште ончыл верыш лектеш.
Военный лийнеже
Кирилл Кӱчыкэҥер селаште куд шочшан марий ешыште шочын-кушкын. 9-ше класс марте Эҥерсола тӱҥ школышто шинчымашым поген. Вара Коркатово лицейыш тунемаш куснен. Тидын нерген Кирилл тыгерак палдарыш:
– Индешымше класс деч вара кадет классыште тунемаш тӱҥалаш шонен пыштенам. Мый военный лийнем, шочмо-кушмо мландем дене кугешнем да элем аралынем, сандене кадет классым ойырен налынам. Ме йӱла почеш уставым шукташ, командирын приказшым, классын чапшым аралаш, сайын тунемаш да эллан служитлаш товатленна да «Кадеты России» знакым налынна.
Лицейыште мыланем тунемаш келша. Классыште 13 тунемше улына. Пырля тунемме йолташем-влак дене келшен илена, эре ваш полшена. Историй, географий да обществознаний – эн йӧратыме предметем-влак. Тыгак марий йылмылан шӱман улам. Тӱрлӧ конкурсыш, олимпиадыш кумылын ушнем. Районышто сеҥыше-влак коклаш лектам, тидыже вийым ешара, умбакыже тыршен тунемаш кумылым луктеш.
Кадет классыште строевой подготовкылан кугу тӱткыш ойыралтеш, тыгак икшыве-влак военно-патриотический мероприятийлаш чӱчкыдын ушнат. Тиде – «Вахта памяти» патриотический акций, «Авангардыште» эртаралтше «Зарница» модмаш ден слёт-влак, тӱрлӧ конкурс ден форум.
Теннис модмаште – эн сай
Кирилл ӱстембал теннис, куштылго атлетике да ече дене ятыр ий заниматла, сай лектыш дене ойыртемалтеш.
– Визымше классыште тунеммем годым кугурак рвезе-шамычын теннис дене модмыштым ужынам да шкежат модаш тунемаш кумылаҥынам. Тыге Сергей Аркадьевич Александров физкультурым туныктышына дек тренировкыш кошташ тӱҥалынам. Вара школышто эртаралтше таҥасымаш гыч республикысе соревнований марте кушкын шуынам, – ойла тунемше.
Кирилл яра жапыште тӱрлӧ онлайн платформо гоч экзаменлан ямдылалтеш, тыгак пӱртӱсыштӧ канаш йӧрата.