Школышто кажне выпускникым ик йодыш тургыжландара: кӧ лияш? Кушко тунемаш пураш? Анастасия нине йодыш-влаклан вашмутым ятыр кычалын. Изирак класслаште тунемме годым ландшафтный дизайнер але парикмахер лияш шонен. Кугурак лиймекыже, шонымашыже вашталтын: фельдшер специальностьлан тунемын.
А.Герасимова Кужэҥер район Йывансола ялыште шочын-кушкын. Кудымшо класс марте Йывансола школышто тунемын, а вара Йӱледӱр школыш вончен.
Школышто математике ден географийым йӧратен тунемын. Спорт дене пеҥгыде кылым кучен: волейболла, баскетболла, футболла модын. Тӱрлӧ таҥасымаште Йӱледӱр школын командыже эре гаяк сеҥышыш лектын. Настя марий йылме денат олимпиадыште вийжым терген. Кугурак класслаште экзаменлан кыртмен ямдылалтын, мӧҥгысӧ пашам ышташ полшен.Школышто тунемме годымак Настя ава лийын. Ӱдыржӧ кушкеш, тудланат жапым ойырыман.
– Ешыштына медицине пашаеҥ уке, сандене мый Йошкар-Оласе медицинский колледжыш тунемаш пуренам. «Акушерское дело» направлений дене тунемаш пураш шоненам, но балл ситыдымылан кӧра, «Лечебное дело» направленийыш тунем лектынам. Тидлан мый нимынярат ом ӧкынӧ. Тыгак лийшаш, очыни. Таче Йошкар-Оласе Вашкеполыш станцийыште пашам ыштем. Ондак диспетчер лийынам, кызыт бригаде дене кудалыштам. Паша неле гынат, келша. Тӱрлӧ ситуаций лиеда, но чыла чытен лекман. Еҥ-влаклан полышым пуэн кертме, очыни, мыланем эн кӱлешан. Кажне гана черле деке мийыме годым кузе да мом ышташ кӱлмым ушышто вискалем. Родо-влаклан але уремыште эртен кайышылан полшен кертам мо манын шонкалем, – каласыш самырык специалист.
– Студент пагытыште практикыш коштында. Могай шарнымаш кодын?
– Икымше курсышто тунеммем годым мемнан икымше практике лийын. Тунам мый Йошкар-Оласе ик эмлымверыште хирургий пӧлкаште практикым эртенам. Тушто ме тӱрлӧ перевязкым ыштенна, операций ыштымымат онченна. Икымше гана тушто чот лӱдмашан лийын, а вара тунемалтын.
– Икымше паша кечет могай могай лийын?
– Тидым мый сайын шарнем. Ме илалше ӱдырамаш деке миенна. Тудын давленийже волен да нерже гыч вӱр йоген. Жапым шуйкалыде, системым ыштенна, да эмлымверыш наҥгаенна. Эмлызе-влак жапыштыже полышым пуэн шуктеныт.
– Врач лияш шонымаш уло?
– Ончыкылык нерген каласаш неле, но тыгай шонымаш уло. Иктым палем: тиде пашамак ышташ тӱҥалам. Черле еҥлан полшаш мыланем келша. Профессийым чын ойырен налынам!