25 январьыште Тачана-влак шке пайремыштым пайремлат. Лудшына-влак коклаште Татьяна лӱман шукын улыт мо? Кӧ нунылан тыгай лӱмым пуэн? Могай койыш-шоктыш дене Тачана-влак ойыртемалтыт?
Татьяна Пахмурова, Йошкар-Ола:
– Мый МарГУ-што йот йылме-влак факультетыште тунемам. Лӱмем нерген тыге каласен кертам: авамлан омыж дене мыйым Татьяна манын лӱмдаш темленыт. Ты лӱм мыланем моткоч келша. Тудо шкалан ӱшаныше, шке сомылжым мучаш марте шуктышо еҥ улмым ончыкта. Ты кечын мый тыгак Студент-влакын кечыштым йолташ-влак дене пайремлем, ме коньки дене мунчалташ коштына. А кастене ача-авам дене пырля тортым налын кочкына.