Таҥасен туныктыман

15 ноябрьыште Йошкар-Оласе 29-ше №-ан школышто «Педагогический дебют2019» конкурсым иктешленыт. Тыште республикысе эн тале самырык туныктышо, воспитатель да педагог-наставник-влакым саламленыт.

Тылеч ончыч участник-влак Йошкар-Оласе 76-шо №-ан  «Солнышко» йочасадыште занятий, мастер-класс, презентаций-влакым ончыктеныт, проектыштым араленыт. Конкурсышто 34 участник лийын: 17 самырык туныктышо, 8 воспитатель, 9 педагог-наставник.

Таҥасымаш кум номинаций дене эртаралтын. Кажныштыже эн мастарым ойыреныт. Сеҥыше-влак Россий кыкшытыште эртаралтше «Педагогический дебют – 2020» конкурсышто Марий Элын чапшым аралышаш улыт.

Педагог-наставник-влак коклаште эн мастарлан жюри Волжск оласе 5ше №-ан кыдалаш школышто руш йылме ден литературым туныктышо, директорын учебно-воспитательный паша шотышто алмаштышыже Надежда Юрьевна Поляковам шотлен.

Самырык туныктышо-влак коклаште Советский район Солнечный посёлкысо школышто историй ден обществознанийым туныктышо Александра Владимировна Трухина сеҥышыш лектын.

Йочасадлаште пашам ыштыше самырык туныктышо-влак коклаште сеҥыше лӱмым Звенигово посёлкысо «Светлячок» комбинированный йочасадын дефектологшо Анна Владимировна Архиповалан пуэныт.

Анна Архипова  Звенигово район Чуваш Отар ялыште шочын-кушкын. Звенигово оласе 3-шо номеран школышто шинчымашым погымо деч вара Марий кугыжаныш университетыште педагог-психологлан тунем лектын. Ынде кокымшо ий Звенигово оласе йочасадыште деффектологлан пашам ышта. Конкурс шотышто Анна Владимировна тыгерак мане:

– Конкурсыш мый икымше гана толынам. Садлан тургыжланашат логалын. Но сайын ямдылалтынам. Ончыктымо занятием модыш сынан лийын. Йоча-влак скайп гоч Шарик да Матроскин дене пуйто мутланеныт, пуымо йодышлан вашешташ нунын деч полышым йодыныт. Тыгак презентацийым, сӱрет-влакым, мультисенсорный пособийым кучылтынам. Изи икшыве-влак тыге вашкерак тунемыт. Занятийым палыдыме йоча-влак дене эртаренам гынат, нелылыкым шым шиж.

Иктешлыме этап годым патриотизм темылан пӧлеклалтше проектым ончыктенам. Йоча-влакын шочмо элым йӧратыме кумылышт лийже манын, мом да кузе ышташ кӱлмым каласкаленам. Вет чылажат мемнан, туныктышо-влакын, кидыште.

Тиде конкурс туныктышо-влакым паша опыт дене пойдараш, у шонымаш-влакым шочыкташ, мастарлыкыштым нӧлташ тарата. Тыште уш-акылат поян лийшаш, шкем пе‰гыдын кучаш тунемман, еҥвлак ончылно чаткан да лӱдде ойлен моштыман.

Моткоч кугу таум каласем пырля пашам ыштыше туныктышо-влаклан. Нуно мылам шуко полшеныт. А моло педагог ден воспитатель-влаклан тыланыме шуэш: шумо кӱкшытеш чарнен ида шогал, эре уым кычалза, пашадам йӧратыза. Чыла шотыштат чулым лийза да шке мастарлыкдам ончыкташ ида вожыл.