Марий кундемыштына шуко изи ял уло. Кажныжын – шкешотан пӱрымашыже, эртыме корныжо. Параньга районыштат тыгай вершӧр шагал огыл. Ты гана Марий Лебляк да Руш Лебляк ялла дене палымым ыштена. Нуно икте-весышт деч тораштырак верланеныт, тӱрлӧ ял шотан илемыш пурат.
Руш Лебляк Элпанур ял шотан илемыш пура да туддеч кечывалвел-касвелне кок меҥге тораште верланен. Ты вершӧрым Киров областьысе Копылово ял гыч илаш куснышо-влак 1832 ийыште негызленыт.
Кызыт тыште 10 пӧрт уло, тушто руш да марий-влак илат. Еҥ-влак Элпанур ялысе кевытлашке, почтышко, ФАП-шке коштыт, йоча-влак тусо школышто тунемыт. Калыкым мо тургыжландара: ялышке газ пучым шупшмо огыл, корно шаргӱан огыл. Вӱд шотышто тунар нелылык уке: иктын суртышкыжо вӱдым пуртымо, весын тавыже уло.
Вате-марий Зинаида Евдокимовна ден Григорий Фёдорович Федотовмыт Руш Леблякыште 1987 ий годсек илат, тыште кермычан пӧртым нӧлтен шогалтеныт. Шкешт пошкудо Павыл починга гыч улыт.
Зинаида Евдокимовна ятыр ий Элпанур колхозышто тыршен, варажым соцпашаеҥлан ыштен. Кызыт – пенсийыште. Пелашыже Григорий Федорович верысе колхозышто эре электрик лийын, пенсийыш лектын гынат, тачат ты пашам шукта. Маша ден Дина ӱдырышт-влак Йошкар-Олаште илат, ешан-шочшан улыт.
Озавате – тале кидмастар. Руш Леблякыште Зинаида Евдокимовна гына «Кугарня» газетлан подпискым ышта. Кажне лаштыкшым куанен лудеш.
«Ончыч Руш Лебляк чылт руш ял лийын. Варажым марий-влак тышке эркын илаш куснаш тӱҥалыныт. Ожно Онучин ял рӱдылан шотлалтын. Тушто школ, клуб, почто лийыныт. Руш Леблякыште кевыт гына пашам ыштен. Тудым петырымеке, зданийжым клубышко савырыме. Но тудыжымат пужен наҥгайышт.
Умбакыже — 17 декабрьысе газетыште. Кевыт