Марий Элыште тунемше-шамычлан эртаралтше Всероссийский олимпиадын регионысо йыжыҥже тӱҥалын. Тудо 28 февраль марте лиеш да тӱнямбал художественный культур предмет дене мучашлалтеш.
12 январьыште Политехыште 9-11-ше класслаште тунемше 62 еҥ экономике дене задаче-влакым решатлен. Нуным Марий Элысе науко да образований министр Лариса Ревуцкая вашлийын. Ӱдыр-рвезе-влакын ты предмет дене лектышышт 26 январьыште пале лиеш. Нуным Марий Элысе образовательный порталыште вераҥдат.
Тунемше-шамычлан эртаралтше Всероссийский олимпиадылан Российысе Минпросвещений вуйын шога. Тудым «Молодёжь и дети» нацпроект почеш илышыш шыҥдарат. Олимпиадын регионысо йыжыҥыштыже чылаже 1300 наре тунемше уш-акылжым терга. Ты радамыште 7-8-ше класслаште тунемше ӱдыр-рвезе-шамычат улыт. Нуно физике (Дж.К.Максвелл лӱмеш), математике (Леонард Эйлер лӱмеш), астрономий (Струве лӱмеш) предметлам палымыштым ончыктат.
Мероприятий-шамыч Политех, МарГУ, МОСИ, Йошкар-Оласе 31-ше номеран да Медведево посёлкысо 3-шо номеран школлаште лийыт.
Марий Элысе Образований министерствын сайтше гыч налме фото.