Параньга район Яҥгетсола клубышто тӱрлӧ мероприятийым, концертым эртаренак шогат, вес ялышкат лектын коштыт. Кодшо кечылаште Яҥгетсола ялысе «Ший шымаш» фольклор коллектив Кужэҥер район Салтакъялыште концертым ончыктен. А 4 апрельыште СВО-што улшо-влак лӱмеш поро кумылым ончыктымо концертым шынден.
Клубым уэмдыме
Яҥгетсола клубын оралтыже тошто. Тачылан тудым сайын уэмдыме: окна-влакым шындыме, сценысе шарчам (занавескым) вашталтыме, коҥгам кок гана ачалыме, уремыште вес печым ыштыме. 2022 ийыште ты клубым «Районысо эн сай тӱвыра пӧрт» семын палемдыме да тудлан 100 тӱжем теҥгем ойырымо. Ты окса кӱшеш ӱдырамаш-влаклан куд марий костюмым ургыктымо.
Вес кугу паша: Яҥгетсола ялеш шочын-кушшо да сарыште ӱмыр лугыч лийше-влаклан кок ий ончыч обелискым почмо.
Коллективлан – ныл ий
«Ший шымаш» коллективым клуб пелен ныл ий ончыч чумырымо. Тудым клубым вуйлатыше Эльвира Виссарионовна Захарова вуйлата. Кызыт тушко индешын коштыт. Тиде жапыште ансамбль шуко гана сеҥымашыш шуын, вес кундемланат палыме. Мутлан, 2023 ийыште Йошкар-Олаште эртаралтше регион-влак кокласе «Угинде» пайремыштат 13 коллектив коклаште икымше верыш лектын. Тений Ӱярня пайремыште сеҥыше радамыш логалын.
– Салтакъялыш концерт дене ме ик ганат лектын коштын огынал ыле, сандене тушко тарванышна. А тыгеже ӱмаште Марий Турек районышто лийынна, тулеч ончыч – Параньга, Кужэҥер районлаште. Тидыже шкенан артист-влаклан – моткоч кӱлешан паша. Коллективыш коштшо-шамыч тунемын, еҥ-влакым ончалын, тыгодым шкеныштымат ончыктен кертыт.
Салтакъялыште порын вашлийыныт. Тыште руш-влакат улыт. Сандене руш номерымат пуртенна, тыгодым марий муро-куштымашымат ончыктенна. Тыгак марий тӱр вургемна дене палымым ыштенна.
Тиде арнян Параньга районысо клублаште СВО-што улшо-влак лӱмеш концертым шындаш тӱҥалыныт. Ты окса салтак-влаклан ойыралтеш. Тенийысе концертым «В каждом сердце – Россия» манын лӱмденна. Тыгаяк акций эше шуйна. Программым Россий теме дене кылдыме. Сар годсо инсценировкым пуртенна, – мане Э.В.Захарова.
Яҥгетсола ялыште тӱвыра пашам вораҥдарымаште клубым вуйлатыше Э.Захарован надырже кугу. Калыкым культур илышлан шӱмаҥда, тыгодым чапле коллективым вияҥден толеш. Нуно Яҥгетсола ялын лӱмжым кӱшкӧ нӧлтат, чапландараш полшат.