25 мартыште тӱвыра пашаеҥ-влак шке профессиональный пайремыштым палемденыт. Э.Сапаев лӱмеш опер да балет Марий кугыжаныш академический театрыште пайремын торжественный ужашыже лийын. Вара В.И.Ленин лӱмеш тӱвыра полатыште пайрем шуйнен. Икмыняр тӱвыра пашаеҥлан «Марий Элысе тӱвыран сулло пашаеҥже» лӱмым пуэныт. Тыгак тӱвыра, печать да калык-влакын пашашт шотышто министерствын, Марий Эл Республикысе Калык усталык да культурканыш паша шотышто республикысе шанче-методик рӱдерын, тӱвыра пашаеҥ-влак Россий профсоюзын Марий Эл Республикысе организацийжын Почетан грамотшо ден Таумутшым кучыктеныт.
Вара республикысе «Эстрадный вернисаж» фестиваль-конкурсын Гала-концертше лийын. Тушто республикысе эн виян мурызо, коллектив-влак мастарлыкыштым ончыктеныт.