Республикысе Тӱвыра, печать да калык-влакын пашашт шотышто министерствын заседанийже Волжск олаште эртен.
Министр Константин Ивановын палдарымыж почеш, «Культурная среда», «Творческие люди», «Цифровая культура» проект-влак негызеш 2022 ийыште республикыште кок тӱвыра пӧртым тичмашын олмыкташ тынар окса ойыралтеш:
21,8 млн теҥге — У Торъял район Чӱксолалан,
22 млн теҥге — Медведево район, Руш Кукмарийлан.
28,4 млн теҥгелан 6 автоклубым налаш палемдыме.
21,1 млн теҥгеш Козьмодемьянск оласе А.Эшпай лӱмеш Йоча искусство школым олмыктат.
4 искусство школлан семӱзгарым налаш 16,2 млн теҥге палемдалтын.
20 млн теҥгеш 2 модельный библиотекым ыштышаш улыт.
Контрактым шукыжым подписатлыме, чыла паша шукталтеш манын ӱшанена.
Волжск олаште «Звездный» тӱвыра да каныме полатлан виртуальный заллан оборудованийым налаш 2 млн утла теҥгем ойырымо.
Республикысе тӱвыра учреждений вуйлатыше-влак тыгак Волжскышто Краеведений тоштерыште уна лийыныт, экспонат-влакым ончал савырненыт. Тоштерым 2020 ийыште тичмашын олмыктымо, сандене кызыт тудо мотор тӱвыра полатыш савырнен.
