Шукерте огыл чумыр республикна мучко «Иле, мыйын ялем!» фестиваль мучашлалте. Тудын кышкарыштыже кажне марий ялыште могай-гынат мероприятий эртаралтын. А Кораксола тӱвыра пӧртна тиде фестиваль амал дене шым ялыште Марий касым эртарен колтен. Тыгак нине яллаштак йоча-влак дене посна таҥасымаш-влак лийыныт, илалше-влак деке миен коштмо да ялысе колызо-шамыч коклаште ӱчашымашым эртарыме.
Чынжымак, «Иле, мыйын ялем!» фестиваль Кораксола тӱвыра пӧрт пеленысе «Муро кумыл» фольклор ансамбльлан вий-куатым ешарен. Пытартыш Марий каснаже пошкудо Кугорнӱмбал ялыште эртыш. Тышке ме йӧршеш вучыдымын, нимогай увертарымаш дечын посна, миенна, а калык тугай чот куанен да йывыртен мемнам вашлийын. Тачысе кечынат ты куан шӱлыш мемнан чоным вӱчка.
А Кугорнӱмбал ялын чолга эргыже Е.В.Егоров самырык тукымым шочмо кундемым уло шӱм-чон дене йӧраташ ӱжмӧ семын руш поэт М.Ю.Лермонтовын патриотизм шӱлышан почеламутшым туге чаплын йоҥгалтарен пуыш.
Тау Кугорнӱмбал, Эҥерӱмбал да Йогорсола ял калыклан, мемнам тыге порын, шокшын, уло кумылын вашлиймыштлан. Ынде ме кутырен келшышна Илалше-влакын пайремышт вашеш 30 сентябрьыште 13 шагатлан Йогорсола ялыште сылне пайрем концертым ончыкташ. Тек мемнан коклаште ваш келшымаш тул ончыкшымат озаланаш тӱҥалеш!
Елена Григорьева, Кораксола тӱвыра пӧрт вуйлатыше.
Снимкыште: Кугорнӱмбалне Марий касыш погынышо, ик ой дене келшен илыше шергакан калык.
