Пошкырт кундем Краснокам район Ушмен ялеш шочын-кушшо Диана Байгильдина Советский посёлкышто районысо тӱвыра пӧртым вуйлата.
Изинек уста
Школышто тунеммыж годымак Диана мураш йӧратен. Хорышко чолган ушнен, сценышкат шкетын чӱчкыдын лектын. Эн чотшо мастарлыкшым вияҥдаш тӱвыра пӧрт пеленысе кружок полшен. Тушто тудо ончыкылык мурызо семын тапталтын, вокал шотышто негызым налын.
– Ковам ден авам мураш пеш йӧратат. Сандене мыят изиэм годсек тидлан кумылан улам. «Сольно мурымаш» кружокыш 12 ияш кошташ тӱҥалынам. Туныктышем Гуля Анатольевна Ермолина шуко шинчымашым пуэн. Тудлан кызытат таум ойлем, – пелештыш ӱдыр.
Уста специалист
Илыш корныжым муро алан дене кылдаш шонен, Диана школ деч вара Йошкар-Олашке И.С.Палантай лӱмеш тӱвыра да сымыктыш колледжыш тунемаш толын. Тушто «Сольно» да «Хор мурымаш» направленийла дене тунемын. Мастарлыкым профессионально нӧлташ, уста специалист семын вияҥаш колледж тудлан сайын полшен.
Дипломым налмеке, самырык специалист эн ончыч Псков оласе «Радуга» руш муро калык хорышто хормейстерлан пел ий тыршен. Варажым Советский район Голубой посёлкысо клубым вуйлатен, кызыт – Советский районысо тӱвыра пӧртым.
– Коллективна моткоч уста да икоян. Тӱвыра пӧртыштӧ «Рампа» калык театр, ветеран-влакын «Радуга» калык хорышт, «Кугезе кумыл» ден «Мурызо тукым» фольклор ансамбль-влак улыт. Вуйлатыме пашам шукташ куштылго огыл гынат, мылам пашам келша. Южгунамже психолог гай лийын моштыман.
Ме республикысе, районысо конкурслашке, фестивальлашке ушнаш тыршена. Мутлан, «Эхо предков» фестивальыште, «Эстрадный вернисаж» фестиваль-конкурсышто, «Творцы и хранители» конкурсышто шкеннам тергенна.
Пытартыш жапыште ӧрдыж верыш огына лек. Украиныште СВО-што улшо-влаклан окса дене полшаш манын, кызыт район мучко благотворительный концерт-влакым ончыктена.
Ончыкылан фольклор коллективым чумыраш кумыл уло, – мане Д.Байгильдина.
У муро
Шукерте огыл Д.Байгильдинан «Шӱдырем» икымше мурыжо лектын.
Тидын нерген Диана тыгерак мане:
– Тудым коллегем Алёна Епифанова мураш темлен. Мутшым аваже Антонида Щербакова возен, семжым Алёна шкеак келыштарен. Ончыкыжымат нине автор-влак дене пашам ышташ тӱҥалам манын ӱшанем. У мурым темлат гын, уло кумылын мурем.
22 ияш ӱдырлан пашаште кӱкшытым да усталык корнышто лектышым тыланена.