манеш Шернур районышто шочын-кушшо да Параньга район Штрамарий ялыш марлан лекше А.Глушкова.
Алевтина Глушкова (ӱдыр фамилийже Якимова) Шернур район Тоски ялыште шочын. Вара тудын ешыже Параньга район Руш Ляжмарий ялыште куд ий наре илен. Аваже тусо совхозышто дояркылан, ачаже трактористлан пашам ыштен. Кум шочшан ешлан тыште пӧртымат пуаш чоҥеныт. Но Кугу Коклала ялыште илыше чӱчӱжӧ (Алевтинан аважын изаже) колен колта, сандене Якимовмыт еш тушко кусна.
А илыш пӱрымаш Алевтинам Ляжмарий кундемыш мӧҥгеш конден. Тудо 2001 ийыште Штрамарий ял рвезе Володя Глушковлан марлан лектын. Аля чӱчкыдынак кокаж деке Руш Лажмарийышке кудалыштын. Самырык мужыр икте-весе дене шым ий келшен. Тулеч вара гына ӱдыр ден каче ешым погеныт.
Тӱрлӧ вере
Шернур район Кугу Коклала школ деч вара Алевтина У Торъялысе училищыш (тунам высший профессиональный училище (ВПУ) маналтын) ургызылан тунемаш каен. А туддеч вара Шернурысо ик предприятийыште ургызылан, вязальщицылан пашам ыштен. Но тиде тудынлык огыл манын, ик идалык гыч кевытыште ышташ тӱҥалын.
Ты жапыштак Чылдемыр клубысо «Олык марий» ансамбльыш коштын. Тыге тудым 1998 ийыште тиде коллективым вуйлаташ ӱшанат. Участник-влак дене Марий Элын чыла районыштыжо гаяк выступатла. Но пашадарым пел ий дене огыт тӱлӧ. Тунам, 2000 ийыште, Алевтина, тӱвыра аланыште пашам ыштымыжлан ӧкынен, пырля тыршыше ӱдырамаш дене пырля Нижний Новгород олашке маляр пашам шукташ лектын кая. Вес кундемыште ик ий пашам ыштымеке, пӧртылеш да Штрамарий ялыш марлан лектеш. А тыште Алевтинам лач тӱвыра паша вучен. «Тӱвыра аланыште пашам тетла нигунам ом ыште манын шоненам. Но тиде сомылжо пӱрымашемак улмаш», – мане Алевтина.
Клублаште
2019 ийыште Алевтина Алексеевна Руш Ляжмарий тӱвыра пӧртым вуйлаташ тӱҥалын. А тылеч ончыч тыште художественный вуйлатышылан пашам ыштен да Штрамарий тӱвыра пӧртым 16 ий вуйлатен.
Клубышто пашам ыштыше-влаклан ончыч специальность кӱлын огыл, а варажым образованийым налаш кӱштеныт. Тыге А.Глушкова 2009-2013 ийлаште И.С.Палантай лӱмеш тӱвыра да сымыктыш колледжыште «Социально-культурная деятельность» (СКД маныт) специальность дене заочно тунемеш.
«Штрамарий ял калык пеш весела кумылан. Шуко пайремым пырля эртаренна. Вет еҥ-влакын полышышт деч посна нимогай пайрем оҥайын огеш эрте. Ӱярня, Ял пайрем, У ий да тулеч моло пайрем годымат ялысе калыклан эҥертенам», – мане чолга ӱдырамаш.
А.Глушкован мастарлыкше нергенат ойлыде огеш лий. 2018 ийыште Параньга районышто эртаралтше «Марий вате – чолга вате» конкурсышто участвоватлен. Тушто Алевтина Алексеевна Виктория ден Яна ӱдыржӧ-влаклан, тыгак пошкудо ӱдырамаш Анжелика Обуховалан марий тувырым урген-тӱрлен пуымыжым ончыктен. Садланак жюри тудым куд участник-влак коклаште «Кидмастар» номинацийыште ойыртемалтшылан шотлен.
Аля гладь денат, ырес денат тӱрым тӱрла. Кугу Коклала ялыште илыше аваже Нина Михайловнат мастар кидан, еҥ-влаклан ший аршашым ямдыла, сывыным ышта, марий тувырым урген тӱрла.
Руш Ляжмарийыште
Тыште клублан кермыч зданийым эше 40 утла ий ончычак чоҥымо. Тунамак мурышо да куштышо ансамбльым чумырымо. Лач участникше-влак гына вашталтыт. Пытартыш гана тӱвыра пӧртым 2010 ийыште капитально олмыктымо. Тылеч вара лу ий эртен, сандене тушто угыч тӧрлыман, окна-влакым вашталтыман. Но кызытеш ты пашалан шийвундым ойырымо огыл.
Тӱвыра пӧртыштӧ ӱдырамаш-влакын «Локама» ансамбльышкышт 10-12 еҥ коштеш. Нуно тӱрлӧ мероприятий годым выступатлат. Кодшо ийын тӱвыра пӧртышкӧ самырык рвезе Леонид Егоров толын, аккомпониаторлан пел ставкыште пашам ышташ тӱҥалын. Такшым тудо И.С.Палантай лӱмеш тӱвыра да сымыктыш колледжыште «СКД» манме специальность дене тунемеш.
Мурен-куштымо деч посна тӱвыра пашаеҥ-влак спортланат кумылаҥдат, тӱрлӧ мероприятийым эртарат. Тӱвыра пӧртыштак спортклубым почмо. Кажне ийын 23 февральлан волейбол дене турнир лиеш. Тудым Афганистаныште да Кечывал Осетийыште вуйым пыштыше-влак Ю.Романов ден А.Князев лӱмеш эртарат.
9 Май пайремлан тӱвыра пашаеҥ А.А.Глушкова ден Руш Ляжмарий администраций вуйлатыше А.А.Гладышев пырля яллашке миен коштыныт. Нуно Руш Лажмарий, Штрамарий, Юлтышка, Скрябино ялласе обелиск-влак воктеке пеледыш пыштеныт. Вет ты кундемыште лач ныл ял шотан илемыште шарныктыш вер уло.
Кум шочшан ава
Глушковмыт кермыч пӧртыштӧ илат, кум шочшышт уло. Виктория ӱдырышт Йошкар-Оласе медколледжын икымше курсыштыжо тунемеш, фармацевт лияш ямдылалтеш. Яна Руш Ляжмарий школышто 7-ше классым тунем пытара. Спорт дене ятыр сеҥымашыже уло. Футбол дене модаш йӧрата. Тудын коштмо «Ляжмаринка» команде республикнан чапшым Юл кундемысе федеральный округышто икмыняр гана арален. Алёша эргышт 2-шо классышке вончен. Тудат спортлан шӱман, шыже кроссышто икымше верым налын.
Владимир пелашыже Йошкар-Олашке ынде луымшо ий кудалыштеш, кӱртньӧ омсам ямдылымаште пашам ышта. Суртпечыште ты еш ушкалым, презым, шорыкым да кайывусымат ятыр онча. А тӧрзаште мотор пеледышыже-влак эре моторын койыт, пуйто нуно огытат кошко да кажне кечын пеледыт. Тидыже суртозан пашам йӧратымыже да чаткалыкше нергенат ойла.